Homily By Rev. Fr. Raphael Khuppi (Christmas ni, 2021)
Lungdam Pawini
Dec 25
“Van asang belna ah Pasian minthang ta hen. Leitungah lungsim hoih lungsimpha anei mite tungah zong kilemna om ta hen.”
Messiah Topa in eite adingin kilemna hong puak hi. Leitungah thudik lungsim anei mite tungah kilemna om tahen ci-in kilemna hong puak ahi hi. Pasian tapa leitungah hong paina pen kilemna apia dingin hong pai hi. (Is 9 : 6-7) na sungah en leng kimu thei hi. Amah a om na gamin kilemna tawh kidim dinga, bei hun neilo ding hi ci hi. Kilemna I cih tak ciangin Pasian ukna mun, Pasian vangliatna a om na, Pasian tawh nuntak khopna mun cihna hi.
Tua ahih manin Laisiangtho in “Ama hangin kilemna in guntui bangin luang dinga, thuman leh kilemna kihual khawmin khangkhia ding hi,” ci hi. Topa Jesu hong paina hangin leitungah kilemna, nopsakna om taktak mah hiam? A om na mun zong om mah ding hi. Ahi zongin leitung mitmuhna ah om lo hi zong kici thei hi. Ahi zongin kilemna I cihin mite mitmuhna ah akilem hi pah lo-in, mihing lungsim sunga om kilemna, khat leh khat mawh kimaisakna leh khat leh khat ki theih siamna te zong kilemna mah hi veve hi.
Pasian tapa mihing hong suahna tawh kilemna a piangsak pah hilian lo-in, kilemna lam hong sialsak, kilemna abawl ding mihingte hong sawl ahi hi. Hih thu hangin “kilem nading a sem mite in thupha angah uh hi” ci-in (Mt 5 : 9)na sungah Topa Jesu in hong gen hi. Kilemna I cih pen amanpha nuntakzia leh man anei, man tampi piak a kul kilemna hi. Tua ahih manin Pasian tapa in zong kilemna lampi hong lah na dingin min leh vang etlawm nate, deih huai nate khempeuh suplawhin, a vantung tokhom suplawh hi. Pasian taktak hi napi-in nasem bang, sila bangin Pasian leh mite ki kal ah, mi leh mi kikal ah ong kikhap hi, (Phil 2:6-7) sungah ki mu thei hi. Nasem khat bangin hong nuntakna tawh Pasian leh mihing, mihing leh mihing kilem nading hong semkhia ahi hi.
Tua ahih manin Christmas ii thupha namkhat ah akihel ahi, kilemna eite sungah hong om taktak mah hiam? Leitungah kilem theih na dingin gam khat leh gam khat kilem masak kul a, gam khat leh gam khat a kilem theih na dingin gam sunga om gam mite kilem kul hi. Gam sunga om gam mite kilem theih na dingin gam uk te leh gam uk na sungah a om mipite, mipi sung mahmah ah zong innkuan sung, ki pawlna tuamtuamte a kilem masak loh phamawh hi. Tua kipawlna tuamtuam te a kilem theih na dingin ei mahmah sungah kilemna a omloh phamawh hi. Tua ahih manin kilemna kumpi eite sungah suaksak lehang kilemna in eite sungpan hong palhkhia in, I kiim I paam omte mahmah zong kilem sakin, I innkuanpihte kilemsakin, I veng I paam kilemsak dinga, I gam I lei kilemsak ding hi cih pen tuni I gennop bulpi hi.
Tua ahih manin Christmas in eite ading in lungkhamna hun himah ta se leh lungsim sungah lungdamna takpi ahih theih na dingin eite lungsim Bawngkuang sungah naungek Jesu a thakin suaksak ni. Ama ii hong puak ahi lungnopna leh kilemna te palhkhia sakni. Ei hangin khat leh nih a kilem a suah theih na dingin, ei hangin mi a nialsak hilo zaw in mi a kilemsak, mite tungah lungdamna thu a tungsakte I hihzawh na dingin hanciam ciatni.
