Homily By Rev. Fr. Joseph Zo Mung (Jan 4, 2022(Tue)
Mk 6 : 34 – 44
Tuni Lungdamna Laisiangtho sungah Topa Jesu Gungkuang tung pan a tuah ciangin tua lai ah mitampi in ngahin aom na thu I mu, tua mite Topa Jesu in amuh ciangin acing neilo tuu te tawh ki bang hi ci-in hehpihhuai sa-in Pasian thu ahilhna, lungdamna thu atangko na ahi hi. Tua mite in Topa Jesu ii thu hilhna zak nop sa-in, lawp takin om in, ahi zongin khuazan ta, nitum ding hita, nek ding dawn ding omlo ahih na thu zong ahi hi.
Tua ahih manin anungzuipi te kiangah Topa Jesu in hih mite nek ding bang cih ding I hi hiam? A nai a khua te ah van lei ding a om ding hiam ci-in dongin sawl hi. Ahi zongin tua khua nai ah lei ding bangmah omlo ahih manin Topa Jesu in note in nek ding bang nei na hi uh hiam ci-in, tua panin a neihte uh ki dongin Khomun lum nga leh Ngasa tawn nih nei ung a cih ciangin tua te piakhia in, tua ciangin Topa Jesu in Pa Pasian kiangah thungen in tua te khangsak in a hawm ciangin avekpi in a cingna thu I thei hi.
Tua ahih manin tuni, ken bang mah huh thei keng cilo in, ken bang nei ka hiam? Thu ngetsak thei ka hiam? Ka thatang tawh huhna pia zo ka hiam? Sum le Paai tawh huhna pia thei ka hiam? Tua I hih theih te ngaihsun in khat le khat tungah itna kilak ding hi hang. Tua itna I kilahna, I ki hehpihna tungtawnin Pasian in thupha hong pia ding a, leitungah nuntak nuamin nungta in I sih khit ciangin zong vangamah nopsakna ngah ding hi hang.
Tua ahih manin tuni Lungdamna Laisiangtho sungah I Pasian in ama hoihna phatna te Topa Jesu tungtawnin hong lak a, Topa Jesu in anungzuipi te tawh mipi ading na asepna ah bangmah sum le paai omlo, neih leh lam kicing lo himah ta leh Pasian in a hunhun in thupha apiakna, Israel mite Canna gam atunpihna, tua te phawkin tuni eite in zong I Zomite hitaleh, Kawl gam sung hitaleh mi khempeuh tungah tua bangin itna tawh huhna a kipia, a ki huh diamdiam, a ki-it mite Pasian a um mite tungah Pasian in thupha hong pia takpi hi. Hong tung sak takpi hi cih phawkin eite khat leh khat I ki huh diamdiamna, I ki-itna, I ki hehpihna hangin hi ciang dong a tung I hihna thu phawkin mai lam ah i ki-it na te, i ki lemna, i ki huh diamdiam na te I khangsak zawh semsem nangin hanciam ciatni.
