Siangtho Pumpi sanna tawh kisai theih huai thu

Siangtho Pumpi san zia

Monday, March 18, 2024

Banghang in Siangtho Pumpi san ciangin leii tawh san ding ki hanthawn hiam?
Naungek te in a Nu’ nawizu a tep uh ciangin a kam uh tawh tep uh hi.
Tua nawizu in a Nu’ si leh sa pan apiang khia tui hi.
Siangtho Pumpi Sacramentu in Topa Jesu ii si leh sa hi.
Pasian tanu/tapa ahi eite khempeuh ading in Pasian ii Nu itna hong lak Sacramen hi.
Tua ahih manin kam/ lei tawh san ding hong ki hanthawn ahi hi.

Siangtho Pumpi khut tawh san ding bang hang tha kipia lo hiam?
(A kikham hilo in, tha a kipia lo hi. Cidamna tawh kisai in khut tawh san khuan a kipia zong om hi.)
Pawlpi’ hong hilhna ah a kimu thei Siangtho Pumpi ii a them neng te khat ciat ah Topa Jesu om hi.
Kawlgam pan a kibawl Siangtho Pumpi in a ki mu thei a vui/them neuneu te tampi om hi.
Tua a them, a vui te sungah zong Topa Jesu om hi. Siangtho Pumpi pen ih zahtak ding hi.
Khut tawh Siangtho Pumpi san ciangin khut sungah Siangtho Pumpi a nengneng te na cian thei hi.
Tua ahih manin khut tawh Siangtho Pumpi a sang te in khut sunga a belh, Siangtho Pumpi vui te zong leii tawh liak ding kilawm hi.
Na khut na leii tawh na liak nop kei leh na leii bek tawh Siangtho Pumpi sang in.
Siangtho Pumpi Sacramentu in Topa Jesu mahmah ahih manin zahtak ding ahi hi.