Khi thu ngetna, October kha
Khi thungetna khat, lukham nuaiah koih na hangin ih mut theihloh na pan nuam takin ki ihmu thei hi. Khi thungetna sunga, Tonu Maria pahtawina ahi, Ave Maria aw..cih thu ngetna khat vei ih ngetna in Tonu Maria adingin bang mah tawh a kiteh thei lo, a hoih mahmah lingpaak te ahi hi. Khi thungetna leh lingpaak tangthu khat om hi. Dominican zateih ahi, khantawn tangval siangtho khat in lai at thei lo, sim thei lo in zateihte nisim a nget uh thungetna Salan zong sim thei lo hi. Ama nasep pen kong cing, inn phiat leh huan puah cih te ahi hi. Nitak ama nasepte aman ciangin zateih sang aom, biakinn ah pai-in Tonu lim mai ah khukdinin thu ngen den hi. Tua bangin thu anget ciangin Ave Maria thungetna (150) vei ta ngen hi. Tua in Salan 150 a sim tang dingin a sim hi a, tua thungetna a nget khit ciang bek in lum pan hi. Tua ban ah zingsang alawmte thawhma in amah tho masa in biakinn ah pai aa, Tonu notsetna ahi, Ave Maria thu ngetna ngen den hi. Tua bang aa athunget na pen ama nisim na sep khat suak hi. Asawt ciangin Tangval siangtho Makai pa in a dang zateihte tawh zingsang thu ngetna ngen dingin biakinn ah atun uh ciangin Pasian tau tungah Lingpaak te leh anamtui mahmah Lingpaak te mu in Lingpaak ngimnam a zak ciangin lamdang sa mahmah hi. Tua lingpaak te koi pan hong pai hiam cih thei nuam ahih manin Biakinn puah tangval siangthote a dot leh kua mah in thei zo lo hi. Nikhat tua tangval siangthopa a cina in biakinn zong pai zo lo hi. Biakinn apai loh asawt pian ciangin alawmte in biakinn sunga Pasian tau tung leh Tonu lim mai ah Lingpaak aom nawn loh na thu phawk uh a, tua Lingpaak te akoih den pen a damlo tangval siangtho pa hi ding hi ci-in ngaihsun uh hi. Ahi zongin amah in lingpaakte koi pan ngah hi ding hiam cih ngaihsun zo lo uh hi. Tua tangval siangthopa a pusuak lah kuamahin mu ngei lo uh ahih manin ahoih, anamtui mahmah lingpaakte amahin koi pan, koi ci ngah cih kuamahin ngaihsun zo lo uh hi. Zingsang khat, a damlo tangval siangthopa alupna ah na om lo ahih manin a dang tangval siangthote in lungkhamin mun tuamtuam a zon uh hangin amu kei uh hi. Zateih te khat khit khat Biakinn sungah lutin a va zon uh leh tua a damlo tangval siangtho pa in Tonu lim mai ah khukdinin Ave Maria thu ngetna ngenin om amuh uh ciangin lamdang a sa mahmah uh hi. Tua bangin lunglut takin Ave Maria thu ngetna khat vei anget khit sialin paak thawl sungah lingpaak khat ta na ki behlap hi. Tua bangin Tonu Maria notsetna ahi, Ave Maria thu ngetna (150) vei anget khit ciangin Tonu lim phungah lumsukin si hi. Tua hi a, Tonu zahtakin a beel ei khat ciatin zong khi thungetna ih nget simin Tonu tungah huhna angen kawm leh Tonu Lingpaak letsong apia den ih hih na phawkin lunglut takin ngen ciatni. Khi thungetna na pumpi tungah na koihna hangin Satan ze-et na pan hong dal ding hi. Na Khi na zat ciangin Satan a thanem in puk sak hi. Na Khi khin hong mu Satan in nang kiangpan a gamla ah tai mang ding hi. Ih kim ah Satan in hong nehzawh loh na dingin nisimin khi khin ciatni.
