Myanmar Gam Bishop Kipawlna Pan Kha lamah Thahat Nang Pasian Kammal Laisiangtho Simding Hanthawn
Myanmar Gam Siadawpite kipawlna pan Laisiangtho tawh kisai kipawlna (Episcipal Commission for Bible) ah makaipi ahi Archbishop Basilio Athai leh (Bible Apostolate Director) Fr. George Shwe Htun te makaihna tawh Yangon Archdiocese huamsung Siangtho lungtang Parish (Mawbi) ah a (14) veina Pasian Kammal Laisiangtho Pawipi pen Pasian Kammal Laisiangtho Greek lai pan Latin laitawh a lekkhia Lisiangtho siam Misiangtho Jerome phawkna in ama pawini tawh a kinai thei pen dingin Sep 28 leh 29 ni te in nasia takin bawl uh hi.
Tua pawi sungah Pasian Kammal Laisiangtho tawh kisai-in Siadawpite kipawlna pan a Makaipi ahi Bishop Basilo Aa Thaih in ‘’Na kha tha ahat na ding in Laisiangtho sim in” cih thulu tawh thapiak na nei hi.
Amah in Laisiangtho pen ibil tawh ngai-in, i mit tawh en cianin lungsim takpi tawh isim khitteh i lungtang sungah kemcingin nuntak pih nang leh Laisiangtho in upna hong khauhsak in, lungkham sinkham nate pan damna hongpia hi cih phawkin upna takpi tawh ih sim nangin thapiakna nei hi.
Yangon Diocese pan Bishop Francis Than Tun in zong “Pasian in Laisiangtho tungtawn in eite hong hopih hi” ci-in thapiakna nei hi.
A tawpna ah hih Laisiangtho tawh kisai kipawlna sunga vaipuak nei khat a hi Mawlamyin Diocese pan Bishop Maurice Ngut Wai in “Laisiangtho sung pan nuntakna hongpia singkung” cih thulu tawh hanthotna nei hi.
A mah in “Piancil laisiangtho sungah nuntakna hongpia singkung thu (Numei Tonu Maria suan) leh sihna hongpia singkung (Numei Eve suan) thu ci-in ahoih leh ahoihlo hong khentel sak thei singkung namnih om hi. Mihing te in ih deih bang bang ih tel thei hi. A hi zongin Nuntakna hongpia Singkung pen mihing te in ki tam gen mello hi” ci-in Numei suan leh Gulpi suan, nuntakna hongpia singkung thu leh sihna hongpia singkung thu khentel theih na dingin hilhcianna nei hi.
Hih Pasian kammal Laisiangtho Pawi pi Missa Biakpiakna a man khitteh hih (Episcopal Commisssion for Bible) Laisiangtho tawh kisai-in kipawlna sungah a kihel zawh kum (10) val a pha khin teng pen pahtawina laipi piakna tawh hun ki mansak hi.
