A siangtho kiteenna
A Siangtho Kiteenna i cih in bang hiam?
Dotna tawh kisia in: Asiangtho kiteenna ihcih pen pawlpi ngeina (Canonical form) tawh kizui in kiteenna ahi hi. Tua canonical form tawh kizui a pumkhatsuahna angah nupate̕ kiteenna pen sacramentu kici thei pan hi.
Tua leh Canonical form i cih in bang hiam? Canonical Form i cih pen a siangtho kiteenna a pian theih na dingin aphamawh a kisam te hi a, tua te in;
• A kiteengding monu le mopa,
• Kiteenna a bawlsakding Siampipa (minister),
• Ateci ding molaih nih (two witnesses) leh
• Nupa suak dingte gel ii kipiak kiciamna (mutual contract) cih te ahih hi.
Asiangtho kiteenna asuah thei na dingin vaipuak nei Siampipa in (prenuptial inquiry) ci-in pumkhat suahna asang ding ngaknu le tangvalte̕ thu atawmpen kha khat sung peuhmah kantel masa phot hi. Tua bek hilo in, Banns akici, kiteenna a khaktan nuam leh khaktan thei thule la a om hiam ci-in lai kisuang a, kam mahmah tawh zong thumvei vilvel kitangko masa hi.
Bangmah thu nawngkai omlo hi cih ciantaka aki theih khit ciang bekin ani akha kiciang tan in kiteenna Sacramentu piak dingin ki gel pan hi. Kiteenna asang ding tegel zong Sacramentu asan ma un kisittelna le mawhsutna te kineisak hamtang hi. Hih pen Catholic ngeina tawh asiangtho a kiteenna ahi hi.
Tua hi a, asiangtho kiteenna tawh pumkhat nasuah khit ciangin, na it mahmah nalawmnu ahihkeileh na lawmpa pen Pasian̕ mai le pawlpi mai ah kei aa hi taktak ta hi ci-in tangko khinta nahih man in, kua mah dangin hong nawngkai sak thei nawnlo hi. Tua mah bangin nang zong midangte na nawngkai sak thei nawn kei ding hi.
A thupi mahmah khat ah, a siangtho kiteenna na bawl masiah pen na lawm ngaihnu/ na lawm ngaihpa pen nang aa hi nailo ahih manin, amah tawh omkhop ding ngaihsun kha kei in. A zenzen in na omkhop pih khak leh nulepa mawkna (premarital sex) a bawl na hi a, tua in mawhna lian khat ahi hi.
Nulepa mawhna tawh kisai in hih anuai a Laisiangtho munte et beh dingin kong cial hi.
1Cor 7:1-2 / Acts 15:20 / 1Cor 5:1, 6:13, 18/ 2Cor 12:21/ Gal 5:19/ Eph 5:3/ Col 3:5/ 1Thess 4:3-4
Itna leh Deihsakna tawh,
Fr.Khuppi
