Catholic Nisim Lungdamna Laisiangtho. Hun Nautaang Nipi Kaal (27) na. 10.10.2024 (Thurs)
Luke 11:5-13
5. Tua ciangin Jesu in amaute’ kiangah, “Note lakah khat in lawm khat nei-a, tua pa zankim laitakin a lawmpa’ inn ah pai-in,
6. ‘Lawm aw, keima lawmte khat hong zin a, kei’ kiangah hong tung hi. Amah ka vakna ding bangmah ka nei kei hi. Tua ahih manin anlum pum thum hong leitawisak in,’ a ci hi.
7. A lawmpa in inn sung panin, ‘Hong buaisak kei in. Kong ka kalh zo-a, ka tate tawh ka lum khin zo uh hi. Kei tho-in bangmah kong pia thei kei ding hi,’ a ci hi.
8. Ken kong genin ah, ama lawmpa ahih manin, tho-in a pia kei zongin, ngen teitei ahih manin tho-in a kisap zahzah a pia ding hi.
9. “Tua ahih manin note’tungah kong genin ah: Ngen un, na nget uh leh hong kipia ding hi; zong un, na zon uh leh na mu ding uh hi; kiu un, na kiuh uh leh hong kihon ding hi.
10. Bang hang hiam cih leh, a ngente in a ngah uh hi. A zongte in a mu uh hi. A kiute’ aading kong kihon ding hi.
11. A tapa in ngasa ngen leh, gul a pia ding, note’ lakah kua om na hi uh hiam?
12. Aktui ngen leh, aikam a pia ding note’ lakah kua om na hi uh hiam?
13. Note in mi gilo hi napi-in na tate uh na hoih na piak uh leh, tua sangin vantunga om na Pa un ama kianga a ngente Kha Siangtho pia nuam zawsem lo ding ahi hiam!” a ci hi. Hi in Topa’ Lungdamna Laisiangtho ahi hi.
