Catholic Nisim Lungdamna Laisiangtho. Hun Nautaang Nipi Kaal (27) na. 11.10.2024 (Fri)
Luke 11:15-26
15. Ahi zongin amaute kimkhat in, “Amah in dawite a ukpa Beelzebul suangin dawite a hawlkhia hi,” a ci uh hi.
16. A dangte in amah a ze-etna-un vantung panin lim lamdang a ngen uh hi.
17. Ahi zongin Jesu in amaute’ lungsim sunga a ngaihsutna uh thei-a amaute’ kiangah, “Gam sung mi kilem loin a kikhen gam, kisia ding hi. Innkuan sung zong kilem kei leh, kisia-in a puk ding hi.
18. Keimah in Beelzebul suangin dawite ka hawlkhia hi, ci-in note in nong gen manun Satan, amah le amah kilangpang leh ama gam bangci kip theih ding ahi hiam?
19. A zenzenin keimah in Beelzebul suangin dawite a hawlkhia ka hih leh, na nungzuite un kua suangin dawite hawlkhia uh ahi hiam? Tua ahih manin amaute in note thu hong khente ahi ding uh hi.
20. Ahi zongin Pasian’ khutme tawh dawite ka hawlkhiat leh Pasian’ gam note’ tungah hong tung zo hi.
21. Mi thahat khat in hiam tawi-in ama inn a cin ciangin a neihsate a bit hi.
22. Ahi zongin ama sangin a hatzaw mi hong pai-in amah a zawh khit ciangin, amah in a muan a hiamte a sut ding hi, tua khit ciangin a neihsate laksakin a hawm ding hi.
23. Kei hong pawlpih lote in kei hong langpang hi a, kei hong kaihkhoppih lote in a thehthaang ahi hi.
24. “Mi khat sung panin kha nin a paikhiat khit ciangin a khawlna ding zongin a keuna munte ah a vak kawikawi hangin mu lo hi. Tua ciangin amah in, ‘Ka nusiatsa inn ah ka ciah kik ding hi,’ ci hi.
25. A tun kik ciangin tua inn kiphiat siangin kipuah a om a mu hi.
26. Tua ciangin amah pai a, amah sangin a gilo zaw dawi sagih va zawn a, tua mipa’ sungah lutin a teeng uh hi. Tua ahih manin tua mipa a nuntakzia nunung pen in a masa sangin a siazaw hi,” a ci hi. Hi in Topa’ Lungdamna Laisiangtho ahi hi.
