A (9) Veina Khampat Zone Thuhilhsia te Pasian thu Sinbeh na (Renewal Course) pen Kalay Diocese sung Khampat Zone aa om Siampite vaihawm Siamna tawh Oct 8 ni zintung in 12 ni dong ni thum sung nuam takin Khampat Zone Vicar Forane Rev. Fr. John Tual Suum omna Siangtho Lungtang Biakinn pi ah nuamtak in ki bawl hi.
Tua sung ah Pasian thu hilhna pen Khampat Zone Catechist Director Rev. Fr. Cyril Dong Suan Pau in ( Leadership & Mindset) Makaih Hoih Suahna ding akisam thu te leh Lungsim Puak zia cih thulu tawh hilhcian na nei hi.
Tua khitteh Kalay Diocese Social Communication & RVA Director Rev. Fr. Joseph Thang Nen Zo Mung in (Socio Pastoral Communication & The Role of Catechists) Kizopna tawh kisai a theih huai thu te leh Thuhilhsia te ii vaipuak cih thulu tawh hilhcian na nei nei hi.
Sun hun sung teng Pasian thusinna kei nei in nitak Khikhin khit ciang Dotna leh Dawnna hun ki nei hi. Tua hun sung teng pen Sawbua Topa Rev. Fr. Joseph Lal Ngil Neia leh Rev. Fr. Joseph Zo Mung te in makaih uh hi.
A tawp ni pen Pasian thu lungngaihna ki nei in tua hun sung teng Tamu Topa Rev. Fr. Martin Dal Ngaih Do leh Khampat Assistant Priest Rev. Fr. Francia Thang Za Sing te in makaih uh hi.
Thuhilhsia teng tangin Sia khatin tukum Tintan sung panin ka theih ngeiloh uh thuthak tampi thei kha ka hih manun ki puah phat na dingin hoih mahmah hi ci-in a thangahna thu lungdam kohna ah gen khia hi.
Zintun nitak pen Khampat khangno te in Zindawnla nopcitakin sak in a nitumni nitak pen Siadawpa leh Parish tuamtuam pan khangno te hong tung in nitak Lenkhopna nop takin kibawl hi.
A tawpni (12.10.2024) ni Kalay Diocese hong cing hong kem Bishop Felix in Missa Biakpiakna hong makaih in Rev. Fr. Anthony Hem Kho Sei in kha-an vakna nei hi. Missa Biakpiakna man khitteh Zing an nekna tawh A (9) veina Khampat Zone Thuhilhsia te Pasianthu Sinbehna hun nuam takin ki man siang hi.
Hih Khampat Zone Thuhilhsia te Pasian thu sinna ah Sia te (33) kihel thei in damlohna vai tuamtuam tawh hang Sia (5) bang kihel zolo hi. Khampat Zone sunga om Siampi teng a vekpi un pai kim thei bek thamlo in Siadawpa zong kihel thei ahih manin Thuhilhsia te leh thuzuite in tha ngahthei mahmah uh hi.