Khi thungetna hong piangkhiatna

  Khi thungetna kha ahi October kha ii a theih huai thu te

Christian te (mihingte) a huh dingin vaipuak a ngah Tonu Maria ii thu mang ding, zuih dingin Topa Jesu ii deihna hi.

Tua ahih manin a nu pen mihing te ahuh akem ding Nu dingin hong pia hi. (Jn 19: 26-27) 

Tua ahih manin Tonu Maria ii deihna bangin zuihna in Topa Jesu lungkim sak mah mah hi.

Tua ahih manin Tonu Maria ii deihna ahi, Rosary thungetna in koi pan hong kipan in, bang vangliatna nei hiam cih zong theih ding kisam hi.

Kumzalom 12 ma dong, Rosary thungetna cih om nailo hi.

Ahi zongin Tonu a um, a beel zateih te in Tonu kiangah amau hih theih bangin thungetna na nei den uh hi.

A diakdiak in St. Dominic in amah mah i a pat khiat ahi Dominican zateih pan Rosary thungetna na panin Europe gam sungah ki zel sak hi.

Hi bangin Rosary thungetna in siangthona a zui Zateih te kiangpan hong kipan hi.

Tanglai Zateih te in Psamls 150 na pen a pat pan a tawpna dong nisim in sim uh hi.

AD 12 kipat hunin lai thei lo thuzuite leh zateih pawlkhat te adingin Ps 150 tangin, Vantung thungetna (150) vei nget dingin ki ciamteh hi.

Tua hun lai-in amaute in khau hual te pum sakin a thungetna uh bangzah tung ta hiam cih na ciamteh uh hi.

Kim khat te in suangtang tawh ciamteh uh hi.

Tua te in Rosary ii kipatna hi kici thei hi. 

Kumzalom 12 hunin Tonu a zahtak Zateih pawlkhatte in Lk 1: 28 sung pan “Ave Maria aw, hehpihna tawh na kidim hi. Topa in nang tawh omkhawm a, numei khempeuh lakah thupha a ngah nu na hi hi,” cih vantungmi Gabriel in Tonu a nohsetna Laisiangtho Kammal leh Lk 1: 42 sung pan “Na sunga na paai naungeek in thupha ngah hi” cih Elizabeth in Tonu a nohsetna te gawmin thungetna in khat vei nget ciang 150 vei ta na ngen uh hi.

Kumzalom 12 nungsang ciangin Vantung thungetna leh Ave Maria thungetna gawmin, 150 vei  ngen uh hi.

Hi bangin damdam in hong kicing toto in, kumzalom 14 hun ciangin Piantit minam, Capuchin Zateih Henry in Vantung thungetna khat vei nget khit sial in Ave Maria thungetna 10 vei nget ding ciangtan hi.

Kumzalom 15 nung lam ciangpan Rosary thunget ciangin lungngaih ding thu thuk nam (15) ki ciangtan zo hi.

2002 kum ciangin Pope John Paul II in lungngaih ding thu thuk te sungah khua vak thu thuk nam (5) hong bahlap sak hi.

Kumzalom 16 a tun ciangin Ave Maria (10) vei nget khit sial in “Pa, Tapa, Kha Siangtho tungah minthan vangliatna om ta hen” cih thungetna nget hong kipan hi.

Tua banah Ave Maria thungetna ii a gual nihna ahi, “ Siangtho Maria, Pasian nu aw, tu akipan ka sih hun dong un mawhna nei kote adingin thu hong ngetsak tan” cih hong ki bahlap hi.

156 – 1572 kum sungin hong nusia Pope Pius V in, hi thungetna pen a vanglian mahmah thungetna hi cih tangko khia hi.

1917 kum, Fatima khua ah Tonu in naupang thum te ahi, Francisca, Juscinta leh Lucia te kiangah a kilah na ah “Ka Topa Jesu aw, kote mawhna hong maisak inla, meikuangpi tawh hong ki pelh sak tan. Mi khempeuh vantung gam nuampi hong tung sak inla, nong hehpihna a kisam mite a tuam mahmah in hong huh tan,” cih a hoih mahmah leh a thuthuak mahmah thungetna na hilh in a nget den na ding un zong na vaikhak hi.

Rosary gui khat in Tonu Maria leh Topa Jesu te’ nuntakna a kigawm thungetna ahih manin a vanglian mahmah thungetna Khi hong suak hi.

Tapa Jesu ii nuntakna khempeuh a kigawm thungetna ahih manin Khi thungetna in Tonu Maria i a deih pen leh a lunggulh pen thungetna hong suak hi.

Fatima khua, naupang thum te kiangah “Kei-in Khi thungetna Kumpinu hing” ci-in Tonu mahmah in na gen hi.

Tua banah 1858 kum, February 11 ni-in Benedette kiangah Tonu na ki langh a, Tonu in Benedette kiangah “Rosary na neih leh kei tawh khin khawm in” ci-in na vaikha hi.

Lourde khua, Benedette kiangah Tonu a ki lahna pan ahih manin khi thungetna in Tonu tawh thunget khopna hi a, thupi mah mah hi.

Khi, (Rosary) pen ki theih mawh bawlna, paampaihna, ciamnuih bawlna in Rosary a nei, Rosary ii Kumpinu ahi, Tapa Pasian ii Nu (Lk 1: 31), Kha Siangtho tawh a kidim nungak siangtho Maria (Lk 1: 34, 35) pen zahpihna ahi hi.

“Na Nu en in.” (Jn 19: 27)

Rosary leh Pope pawl khat

Khi thungetna in thungetna tawh kisai zuih ding thu te sungah Pope te’ deih pen leh phatna thungetna khat ahi hi.

“Rosary in Laisiangtho ki gawmna pi (the compendium of the whole Gospel) hi” ci-in Pope Pius XIII in gen hi.

Rosary in a hoih pen lungngaihna thungetna ahi hi.

Bang  hang hiam cih leh khi thungetna nget ciangin a ngen pen i lungsim sungah Topa Jesu in mihing suahna hong lakna leh hotkhiatna thupha hong piakna thu te a banban in hong ki langh hi” ci-in B1 Pope John XII in gen hi.

A siangtho mahmah Khi thungetna Kumpinu aw, ko te adingin thu hong ngetsak in.