Kha thu sungah gal hiam
“Khi khin ngiatding kipawlna khat om leh leitung ka zo zo ding hi.” (Blessed Pope Pius IX)
Rosary pen Kha thu ah galvan khat in a ciamteh Misiangtho te sungah Mother Theresa zong ki hel hi. Mother Theresa in a khut ah Rosary bulh den hi.
Khat vei, gamdang khat pai dingin Ngunkuang khawlna, mi kisitna gate a tun ciang, tua lai a nasem khat in, “galvan a keng khat peuh na om kha uh hiam?” ci-in khualzin mite dong hi. Tua ciangin mihon kawm pan Mother Theresa in a khut lamto in “Ken gal van keng ing” ci-in a khut a Rosary lak hi. Tua lai a om mite in lamdang sa mah mah uh hi.
Rosary thungetna tawh kisai in a ciapteh huai, Mother Theresa gen thu pawl khat in-
Rosary thungetna in thungetna khempeuh lakah a hoihpen leh thupha a kicing pen ahi hi. Bang hang hiam cih leh Rosary thungetna in Pasian Nu ahi, Tonu Maria ii lungtang va sukha ahih man hi.
Rosary thungetna in a lamdang mahmah thungetna hi. Bang hang hiam cih leh ngeina thungetna khat ahih banah Pawlpi leh Misiangtho te ii thungetna zong ahi hi.
Rosary thungetna ah haksat buainate ii aphi a kimuhtheih banah ki uplahna, ki muanlahnate zong hong telcian sak thei hi.
Rosary thungetna in kilemna hong pia hi. Bang hang hiam cih leh hi thungetna in Pasian Nu kiangpan hong pai thungetna ahih man hi.
Rosary thungetna in Pasian tawh ki nai nading a vanglian pen thungetna hi.
Rosary thungetna in kei i thungetna lum, ka ki hehnepna leh ka tha ngahna ahi hi.
Rosary thungetna in dawi mangpa nasepna te do nading in a lian pen lum ahi hi.
