Khangno leh Social Media
Khangno leh media ci-in a theih huai thu pawlkhat ki kum dih ni. A masa in Khangno ih cih in kuate hi aa Media ih cih in bang hiam cih cih ki kum ni. Khangno ih cih ciangin a thahat, lawpna a nei, lungsim leh gamtat luheekte zong a ki manlang zawdeuh hunsung, kum 20 gualpawl pen khangno in ki ciamteh hi. Hihbang hun sungin mailam nuntak ziading pen asia leh apha dingzong hong ki khelkhen thei hi.
Social Media ih cih ciangin tangzai mahmah in gending tam mahmah aa atom in gen leng Taangpi Kizopna ahi hi. Taangpi Kizopna ih cih ciangin mi tampi-in a zat uh thu leh la ki zaksakna, liim leh mel ki lahna ci leng ki khial lo ding hi. A diakdiak in gen leng Internet ahi huih lak aa leng kizopna Facebook, Twitter, Instagram, Youtube cihte ahi hi.
Ih gensa mah bangin khangno ih cihte in thu leh la a theihnop laitak uh, mi hih bang a hih sawm, lungsim leh thatang hat uh aa lau neilo se uh hi. Hih bang hun sungin Social Media pan thu leh la, lim leh mel a sia leh a pha tangpi a om pen en in a muh uh ciangin khen khat ten paikhelh lawh uh hi. A hoih lam in a zang pawlkhatten thu leh la tampi thei-in pilna ngahin hamphat lawh uh hi. Ih zatzat Social Media a hi Facebook leh Messenger, Twitter, Instagram, Youtube cihte ah thusim cih om lo hi.
Tuhun mi tampi takin social Media aa khatvei a ki khahkhinpen ih phiatkik pah phial zongin na en kik thei uh hi. Video ahi aa lim leh lai ahi zongin na etsa (view) khatpen Social Media ah nang ma min (account) tawh ki en ci-in aki ciamteh khin ahi hi. Video khenkhatte bang nangma min tawh na-etpen na pass word hong genkik ding aa, tua na gelh khit aa kipan na omna nun nagawn tawh hong ciamteh ahi uh hi. Mi pawk khatten Social Media tungtawn in a nuamna, dahna leh a hehna thangpaihna khempeuh gelhin lim leh mel post pahpah uh hi. Khen khatin Social Media pen thukhen zum bangin a ngaihsun tawh kibang hi. Hehna leh thangpaihna tepen mi tampi-in a muh uh ciangin a lung uh a kim ding a sa tawh ki bang hi.
Thugen siam ten mi khat ih me kawk tawh heh in mawhsakna tawh ih kawk leh ih kuhpi in Vantung kawk aa tua in Pasian mawhsak in, khutme thum tengin ei mah hong kawk kik a hih man in ei mau mah a khial leh a mawh zaw hi na ci uh hi. Tua bang mah in hehna leh thangpaihna tepen ih pulaak leh ei mau mah a khialzaw ih hikha thei ding hi.
Ih khut sung aa ih tawi Phone neu khat tawh mun tuamtuam aa thupiang a hoih leh hoihlo tampi ki mu thei aa khangno pawlkhat ten tuate en in nasep dingzong don lo uh hi. Innkuan sungah zong hamsatna tampi a pian lawh pawlkhat om uh hi. Pawlkhat ten a hoih lam in zangin nuntakna dingin phat nuamna leh pilna ngahna in nei uh hi. Tua ahih man in mimal a kua mahpeuh in a hoih aa zat ding leh a sia aa zat ding ih teel siam a kul ahi hi. Topan mimal kim aa dingin a hoih aa a zangsiam leh nuntak nuam thuhoih la hoih kikup khopna Social Midia ahi dingin thupha hongpia kim ciat ta hen.
