Synodal Journey Workshop (2.10.2023)
Gamsung buaina tuam tuam a om kawmkal pan Synodal Journey Workshop pen Yangon CBCM pan hong pai National Director of Peace & Justice Rev. Fr. Noel Naw Lat makaihna tawh Kalay Diocese leh Hakha Diocese ki pawlin Kalay Diocesan Pastoral Centre, Kalaymyo ah Oct 28, 2023 ni-in noptak in ki bawl hi.
Hih Synod on Synodality cih pen Alianbel Siampipa Pope Francis ii ngimna gelna tawh kizui-in Nu Catholic Pawlpi pen Synodal Church (Communion, Participation & Mission) ahih theih semsem na dingin Oct, 2021 kum pan kipan in Parish level, Diocese level, CBCM level, Asia Continent level cih bangin thu kikupna (Workshop) a ki bawl toto ahi hi.
Tua Workshop te tungtawn in CBCM pan Makai-in Diocese kim ih Kawlgambup ah nasepna te a tangzai semsem na ding deihna tawh (guideline) lamlahna hih anuai aa bangin hongpia hi.
External Strategic Directions
1) Education
2) Health
3) Migration
4) Humanitarian
5) Safeguarding
6) Faith Formation
Internal Strategic Directions
1) Enhancing Capacities & Competencies
2) Socio- Pastoral Coordination
3) Inter-Religious Engagement
4) Environmental Justice
Hih (Guideline) Lamlahna tawh kizui-in Kawlgam sunga om Diocese kim in (2023-2026) kikal kum (3) sungin sepzawh zahzah in sem khia hamtang ding cih deihna tawh Kawlgambup Siadawte kipawlna (CBCM) pan Makai-in Diocese kim ah sepding bawlding zia kikupna (Workshop) ahong bawlsak ahi hi.
Hih Workshop bawlna ah Hakha Diocese pan Siadawpa, Siampite, Nungak Siangtho te leh thuhilhsia te vekpigawm (12) hong pai-in Kalay Diocese pan Siadawpa, Siampite, Religious Siampite leh Nungak Siangtho te, thuhilhsia te tawh vekpi gawm (25) kihel thei hi.
Hih atunga guideline te tawh kisai nasep zia ding kikupna pen zingsang nai 8:00 pan ki panin nitak lam nai (4:30) ciangin ki man siang hi. Hih thu kikupna tungtawn in nasep ding zia te pen laidal tungah picing takin a kigelh khin hita ahih manin lungdam huai mahmah hi. A hi zongin tuni laidal tung bek ah hi nawnlo in phattuamna a om takpi dingin ih sepkhiat zawh ding pen Siadawpa leh Siampite makaih siamna leh thuzuite hanciamna tampi kisam pha mah mah lai ding hi.
Hih Synodal Process tawh kisai-in sep ding bawlding gelkholhna a om te khempeuh Khasiangtho Pasian lamlahna tawh limtakin ih sepkhiat zawh nangin hanciam ni. Ih ngimna ih geelna te ih Biak Topa Pasian in hong gualzawh pih den ta hen! Amen.
By Fr. Joseph Zo Mung (Director of KOSC & RVA)
