Tate thu hilh zia ding
Paunak Laisiangtho sungpan ta te thu hilh dan ding lampi nam (10)
(Pau 1:7, 9:10) (Ps 1:7)
- Na ta te in Pasian azahtak theih nadingin thu hilh in.
- Ta te in Nu leh Pa te azahtak theih nangin hilh in.
- Na ta te in midangte tungah itna a neih theih nangin hilh in.
- Na ta te in a lungsim uh a kikep zawh nangin hilh in.
- Na ta te in kholhpih lawm leh gual a khialh loh nangin hilh in.
- Na ta te amau leh amau a ki kep zawh nangin hilh in.
- Na ta te in a kam, a muk, a leii uh a kikep theih nangin hilh in.
- Na ta te in sum leh paai, neih leh lamh te a zat siam theih nangin hilh in.
- Na ta te in nasep a hanciam theih nangin hilh in.
- Na ta te in hong khangcing in zi leh pasal a neih uh ciangin a zi/a pasal tawh a kip zawh nangin hilhin.
a/ Na ta te ading thungetsak in.
Na tuak thu khempeuh Pasian kiangah genin. Ta te na neihna hangin Pasian tungah lungdam ko in. Na ta te’ cidam nading, pilna ciimna ding, thumang nading thu na ngetsak banah amau leh amau in thu a nget theih nading in zong hilh inla thu ngen sak in. Adiak diak in amaute in gentheih haksatna a thuak uh ciangin tua haksatna te ah Pasian in amuate’ aw za in huh hi cih thu thei sakin.
b/ Pasian thu genpih in
Na ta te tawh na ki ho ciangin Pasian thu leh upna thu zong gen zel in. Nuntakna sungah supna baaina te thuak mahtaleh Pasian um in Pasian tungah muanna hangin thupha tampi a ngah kik te thu gen pihin. (Gentehna)-Abraham, Job thu leh upna hangin simmawh bawlsiatna a thuak misiangtho te in siatna tung lo-in Pasian in amaute tungah lungnopna apiakna thu te thei sakin.
c/ Biakinn paipih den in
Biakinn tawh kisai nasepna te ah a ki hel nading un Nu leh Pa te in hanthawn in. Laisiangtho sim sak den inla, a sim Laisiangtho te a tel nading un hilh in. Pasian pen mit tawh a ki muh theih loh hangin eite tawh hong omkhawm in hong huh den hi cih thu genin. Pasian tawh lo-in ih nuntakna ah a ki kalsuan zawh lohna zong gen in.
Kipawlna khat ahi aa, gam khat ahi zongin a khantoh na dingin innkuan in a thupi pen hi. Innkuan cih pen itna a khantoh nading in Pasian in hong piak mun leh khat leh khat ki it na dingin itna letsong om na mun ahi hi. Topa Jesu mah mah in “Note khatpeuh in kei hong um hih naupangnote khatpeuh mawhna a bawlsak a om leh a ngawng ah angawina suang golpi khat ki-oksakin tuipi thuk sungah kikhiasuk leh ama adingin hoihzaw ding hi.” (Mt 18:6) ci-in gen hi.
Tua hi aa innkuan sung, gam sung, pawlpi sung a khantoh na dingin mai lam ah ih muan ih suan ding te, mipil misiam, makai muanhuai, makai hoih te hong suah theih na dingin Nu leh Pa te in a thupi mahmah ih hihna phawkin na ta te uh Pasian deihna tawh kituak in a makaih zo, lam a lak zo te hih theih nang ih ki hanthawn hi.
