Catholic Nisim Lungdamna Laisiangtho. Hun Nautaang Nipi Kaal (34) na. 28.11.2024 (Thurs)

Luke 21:20-28

20. “Galkapte in Jerusalem khuapi a umcih na muh uh ciangin tua khua a siatna ding nai ta hi, cih na thei ta un.
21. Tua ciangin Judea gam a omte mual tungah tai ta uh hen. Khuapi sungah a omte taikhia ta uh hen. Gamlak ah a omte khuapi sungah lut kei ta uh hen,
22. bang hang hiam cih leh, tua nite in a kigelh kholsa khempeuh a tangtunna dingin mawhna dan piak nite ahi hi.
23. Tua nite-in naupaai numeite le nawi ne lai naungek a nei nupite in gimna a thuak ding uh hi. Bang hang hiam cih leh, hih leitung ah gimna lianpi tung dinga, hih minam’ tungah zong thangpaih hehna a tung ding hi.
24. Amaute namsau-in si ding uh a, gam khempeuh ah sal dingin kaihna a thuak ding uh hi. Gentile mite’ ukna hun a bei khit matengin Gentile mite in Jerusalem khuapi a khe-un a tuancil ding uh hi.
25. “Ni, kha le aksite’ tungah limte hong kilang ding hi. Leitung ah tuipi lian le tuihual kilok gingte hangin minam khempeuhte lungmangin a dah ding uh hi.
26. Leitunga a tung ding gimna teng mite in ngaihsun kholkhol ding uh a, kihta-in lau-in a sibup ding uh hi, bang hang hiam cih leh, vantunga om vangliatnate a kiliing ding uh hi.
27. Tua ciangin vangliatna le minthanna tawh meii lakah hong paisuk Mihing’ Tapa amaute in a mu ding uh hi.
28. Tu-in hih thute hong pian a kipat ciangin note khuadak unla na lutang uh phongto un. Bang hang hiam cih leh note hong kitatkhiatna ding hun hong nai ta hi,” a ci hi.

Hi in Topa’ Lungdamna Laisiangtho ahi hi.