Pumpi’deihnate Le Nuntakzia
Pumpi’deihnate cihciangin (passions) uutna, duhna, deihna cihte hi in, pumpi silesa sungpan hongpai khia in, mihing nuntakna hong hawlkawikawi nate cihnopna ahi hi. Hih pumpi’deihnate in mihing khat ii nuntakna melsia sakin, khanuntakna zong suplawhsak thei hi.
Tua hi a, pumpi’deihnate in
(i) lungsim (mental or sphycological life)
(ii) pumpi (physical life) le
(iii) kha (spiritual life) athum in susia thei hi.
(i) Lungsim siasak thei
Pumpi’deihluatnate in ngaihsutna ukin, ahoih apha te tungah gualzo in, kilawm kilawmlo cihte khentel theihna susia hi. Asiangtho, Pasian’deihna nate tungah i-ngaihsutna hong tuntosak zolo in, i-ngaihsutna hong ukcip hi. Ahoih apha ngaihsutna thagui kisiasak hi.
(ii) Pumpi siasak thei
Pumpi mahmah damlosak, melsiasak, satonsak in ahunlo in leitung mangpha hong khaksak thei hi. Hante ah paikawikawi leng Singlamteh te tungah akigelh kumte pen atamzaw kum (35-58) kikal na hihi. Nungkha November (2) ni in, Kawlpi hanpi (Dhowinchaung) ah kamuh thu ahihi.
Pumpi’deihluatna te in pumpi damsaklo thute natampha diak sese hi. An ahi a, sa hi in, zu le zate ahizongin, pumpi ahoihsak, adamsak, akhangtosak nate sangin, hong nasak, hong gimsak, hong sumsak, hong zawngkhalsak nate nahi sese hi. Aw! leipumpi aw poi taktak ciai maw!
(iii) Kha nuntakna siasak thei
Pumpi’deihluatna te in Pasian i-ittheih nading lampite hong khaktan sakin, hong nawngkaisak den hi. Tuabek thamlo, venglepaam zong Pasian’deihna bangin i-it ding hong nawngkaisak hi. Pasian tawh ki-itna hitaleh, mihingte khatlekhat ki-itna hitaleh hong susia thute lakah pumpi’deihluatnate (passions) hipha diakse hi.
Tua hi a, i-pumpi’deihluatnate mangden leng, nuntakhoih, nuntakpha, tawh kigamla semsem banah, vangam nangawn hong galmuhsaklo thei thu nahi gige hi.
Hihthu hangin St. Clement of Rome in “kammal te ama munciat ah nazat theihna dingin kisin in; awsang awniam zatnading mun telsiam in. Nektheih khempeuh nekding hilo a, dawntheih khempeuh dawnding hilo hi. Na kammal zah mah in, nanek nadawn te thupi a, nanek nadawn zui in, nalungsim paizia hong piangding hi. Na lungsim pianzia in nanuntakna asuak ahihi” naci hi.
Rev. Fr. Damian Dal
