Catholic Nisim Lungdamna Laisiangtho. Adventu Nipi Kaal (1)Na. 4.12.2024 (Wed)

Matthew 15:29-37

29. Jesu in tua mun a nusiat khit ciangin, Galilee Tuipi dung kantan a, mual tungah kahto-in a tu hi.
30. Mihon tampite in a pau theilote, mittawte, khebaite, a poite le cina dang tampi hong paipihin, a khe gei-ah hong koih uh a, Jesu in amaute a damsak hi.
31. A pau theilote pau thei a, a poite damkikin, khebaite lam pai thei a, mittawte in khua a muh theih uh mihonpite in a muh uh ciangin lamdangsa uh a, Israel’ Pasian a phat uh hi.
32. Tua khit ciangin Jesu in a nungzuite a kiangah sam a, “Keimah in hih mite hehpihhuai ka sa hi, bang hang hiam cih leh amaute ni thum sung ka kiangah hong om khin uh a, a nek ding uh a nei nawn kei uh hi. Amaute gilkialin a ciah ding uh ka deih kei hi; tua bangin ciah le-uh lamkalah a tha uh bei kha ding uh hi,” a ci hi.
33. A nungzuite in, “Mihonpi hihzahta vakna dingin hih gamlakah koi panin khomun ngah ding ihi hiam?” a ci uh hi.
34. Jesu in amaute’ kiangah, “Khomun lum bangzah nei na hi uh hiam?” ci-in a dot leh, “Lum sagih le ngasa neu tawm khat a om hi,” a ci uh hi.
35. Tua khit ciangin Jesu in mihonpite leilak ah a tutna dingin thu a pia hi.
36. Tua khomun lum sagih le ngasate la a, lungdam a koh khit ciangin balnenin a nungzuite pia a, a nungzuite in mihonpite a pia uh hi.
37. Mihonpite in gilvah takin a nek khit uh ciangin a vallai teng a them a nengin a top uh leh seng sagih a dim hi.

Hi in Topa’ Lungdamna Laisiangtho ahi hi.