GOlDEN JUBILEE of the Presence of Catholic Faith at Lailo Village, Tedim Parish (28-29.11.2024)

Lailo Khua ah Catholic upna khaici a ki tuh zawh kum (75) cinna Golden Jubilee Pawipi pen November (28-29.11.2024) ni-in noptakin ki bawl hi.
Nov 28, ni zintungin nitak lenkhopna zong nopci takin kibawl hi. Nitak lenkhopna hun sung in Rev. Fr. Peter Lian in Lailo khua sung leitung thu leh kha thu lamah a khantoh na thu te leh mailam hunte ah bangci bangin Mission sem ding cih thu tawh kisai-in kha-an vakna nei hi.
Nupi, papite leh khangnote in zong Zongeina lamna te leh lasakna tuamtuam te nei uh hi. Tua sungah Siampi (6) leh Deacon khat kihel thei in tha kingah mahmah hi.
Nov. 29, ni Biakinn tualah Jubilee Mualsuang thupha piakna leh mutpuak khau atsatna te Rev. Fr. John Lian Cin Pau, Rev. Fr. Philip En Khan Mang leh Rev. Fr. Robert Pau Gin Mung te makaihna tawh ki bawl in Missa Biakpiakna pen Lailo khua pan Siampi a suak masa Rev. Fr. Robert Pau Gin Mung makaihna tawh ki bawl hi.
Missa Biakpiakna sungah inntek Suampipa Rev. Fr. John Lian Cin Pau in Jubilee thupha ih cih in bang hiam cih thu limtakin hilhcian na a neih hi.
A mah in Leitang a om manin Jubilee a kibawl thei a hih manin ih gam ih leitang te itin puahsiam ni tua ban ah Jubilee Pawi ih sim ciangin mawh ihsut ding leh mawhmaisak na ih piak ding kisam pha mahmah hi ci-in Jubilee tawh kisai a theih huai thu manpha tampi hong gen hi.
Jubilee Pawipi ni pen khua kimkhua pam pan pawisim mi hong ki behlap in Missa Biakpiakna sungah Siampi (9) leh thuzuimi tul val pha dingin ki lamen hi.
Jubilee Pawi sung nek leh dawn tawh kisai-in Sial nih Vok nih leh ak tampi kigo in pawi sim tengin kha lam bek hilo in nek leh dawn lam ah zong nuamsa thei mahmah uh hi.