Catholic Nisim Lungdamna Laisiangtho. Adventu Nipi Kaal (3)Ni. 15.12.2024 (Sun)

Luke 3:10-18

10. Mihonpite in John’ kiangah, “Tua bang ahih leh, kote in bang ka hih ding uh hiam?” ci-in a dong uh hi.
11. Amah in, “Puanak nih a neite in puanak nei lote tawh hawm ta hen. An nek ding a neite in zong tua bangin hih ta hen,” a ci hi.
12. Siahdongte nangawn kituisawp dingin hong pai uh a, “Sia aw, kote in bang ka hih ding uh hiam?” ci-in a dong uh hi.
13. John in amaute’ kiangah, “Note in a kiciangtan zah val na dong kei un,” a ci hi.
14. Galkapte in zong, “Kote in bang ka hih ding uh hiam?” ci-in a dong uh hi. John in,“Note in zawhthawhna tawh ahi zongin, zuauthu-a mawhsakna tawh ahi zongin kuama kiang pan bangmah sut kei un. Na septhaman zah uh tawh lungkim un,” ci-in a dawng hi.
15. Mi khempeuh in John pen Christuo ahi kha ding hiam, ci-in lamenin a lungsim sung uh ah a ngaihsut laitak uh ahi hi.
16. John in, “Note tui tawh kong tuisawp hi; ahi zongin ka nunga hong pai dingpa, kei sangin vanglianzaw ahih manin ama khedap khau suut ding nangawnin ka kilawm kei hi. Amah in Kha Siangtho le mei tawh note hong tuisawp ding hi.
17. A khutin lawhpi tawi-in a buhphual a zap siang ding hi. A tak teng sal sungah koih ding hi. A site ahih leh, a mit ngeilo mei tawh a hal ding hi,” a ci hi.
18. Tua ahih manin John in mipite thu dang tampite tawh hanthawn a, amaute’ kiangah lungdamna thu a tangko hi.

Hi in Topa’ Lungdamna Laisiangtho ahi hi.