Pilvangna Supna Omlo!

Akigen khempeuh up pahpah napen ngaihsutna picinglo cihna hi a, thumuhna neihlohna ii khiatna zong ahihi.

Zak khempeuh up pahpahna in bil zatkhialhna lianpen khat ahihi. Bil pen khuaktawh akizom hi in, amahbek leilak aa apo hilo a, lutang tungah khuakgei neh mahmah in hong kikoihsakngiat ahihi. Anih a zatkhawm theihding thupi hi.

Muh khempeuh muhbanglian in thukhen in mawhpaihna, thutanna cihte manlangluat ding hilo hi. Mitmuh pen atungtham bek hithei hi. Muhtawh thukhen pahpah leng, zakna leh khuakte amawkna pi asuaksak ihi kha dinghi.

Mit pen bilnih ii laizangah hong kikoihsak ngiat hi. Zakna tawh kopkhawm in, muhna ii khiatna teltheih nadingin khuaktawh akinai penpen mun ah apiangsak Pa in nakoihngiat hi. Zatkhopngiat ding ahihi.

Pilvangna ah supna omlo hi. “Buiipi leikeii in zong khuangai”, ci in, khanglui te’n paunak nanei hi. Muh bangbang gennopna, zak bangbang thumansak na leh uut bangbang paukhiat gelhkhiatna te in break aneilo cycle lamsuk hawltawh kibangin, sawtkimanglo hi.

Kammal in guilezam nei hi. Lamkhatpan pen gu nei hi cihtheih thu ahihi. Hihthu hangin khangluite in, “Thallam cilsiat” cih paunak nanei uhhi. Tua banah “Zuau in akhaptawn”, ci in, kampau kidophuai zia leh kidoplohna ii alauhuai zia, eima tungmah hongtungkik ahihna thu thuciin in nanei khin uhhi.

Kammal zatbek zong pilvang zoleng supna omlo pen hi. Thungaih thuzakzong pilvak zoleng kikhiallo pen hi. Ommun khawlmun zong pilvak zoleng lungmuan ompen hi. Omzia khawlzia zong pilvang zomah leng thupha omzaw hamtang hi.

Rev. Fr. Damian Dal