Christmas Hun: Pasian Biaktakpi Ding Hun
“Mipil thum te inn sungah amaute lut uh a, naungek leh a nu Mary a mu uhhi. Amaute khukdin’in tua naungek a biakkhit uh ciangin a vanpuakte uh suahkhia uh a, kham, saledi paknamtui, leh myrrh paknamtuite, letsongin a pia uhhi” (Mt 2:11).
Leitungmi te honggum khia eite Topa Jesu Christ suahpawi pi i muakna sung ah athupi penpen thu in, akimangngilh den penpen thu ahihi. Tua thu in banghiam cih leh, Pasian Tapa neihsun hina pi, mihing in a hongpianna thu lungdamna pawi in, Pasian taktak leh mihing taktak ahi Jesu Topa, bawngkuang sungah akisial, gumpa leh honpa pen phat in pahtawi bek ding hilo a, eite biak taktak ding Pasian Tapa ahih man, mipil thumte mahbang in, khukdin in biaktaktak ding Topa ahihi.
Laisiangtho sungah mipil thum te in inn sungah lutin, naungek leh a nu Maria amuh ciangun, khukdin’in abia uhhi, ci-in na ki gelhhi. Topa amu taktak, Topa azong taktak te in Topa tawh akituah uh ciang in, khundin’in abia lo Laisiangtho sungah na kiciamtehlo hi. Topa mihinga hongpianna, hongsuahna pawi i cih in, eite in Pasian tapa, honpa leh gumpa pen lasa in phatding bek hilo in, khukdin’in ama mai ah kun a, abia ngiatngiat dingte ihihna hong phawksak hi. Tuhun ciangin phatding bek kiphawk kha in, khukdin’in Topa mai ah kun a, biakding aphawkkha lo kitam hi.
Mipil thum te in, Topa pen bawng annkuang sungah kisial in, naungek ahihna tawh mu hina pi un, amau te neihlianpen te apkhia in, amau te mahmah kiniamkhiatna lian tawh naungek Jesu mai ah kunsuk in khukdin’in nabia uhhi. Topa um in, Topa kamuanghi ci in, Christmas pawi sungah nopsa in, phatna late tawh pahtawi in diangin i om hangin, i biaknop kei leh, Topa a um taktak nailo i hi dinghi.
Mipil thumte in neungek Jesu pen Pasian ahihna abiakna in saledi paknamtui tawh nabia uhhi. Leitung kumpi te kumpi hi cihna in kham tawh nabia uhhi. Mihing taktak hi cihna in myrrh akici sathau namtui namkhat tawh nabia uhhi. Tua myrrh in asih ciangin akivui na ah aluang pumpi nuh in azat uh sathau namtui te hihi.
Rev. Fr. Damian Dal
