Kachin gam, Phakant khua, suangmanpha bawlna kicipna hangin leivukna tawh a si te ading, Jan 15 ni zingsang thungetna ah Pope Francis in thungetsak hi ci-in Vatican news ah ki pulaak hi.
A beisa nithumni in Vatican ah a kikhawm mite kiangah Pope in thu a genna ah Mai (rdSlif;) khuk kim ah asi a mang te leh a kisia inn leh lo te zong gen hi. Tua lai aom, lunggim singimmite ading leh a si te’ innkuanpihte ading in thu ka ngetsak hi ci-in zong gen hi.
Tua suangmanpha zon nasepna ah leicipna hangin a liam a bai te ading in zong thu a ngetsak banah galvan a bawlte hangin a kisim zolo kithahna, kidona te leitung mun tuamtuam ah a om na thu zong Pope in gen in tua te ading zong thu a ngetsakna thu hong thei sak hi.
Hi bang ze-etna te a thuak u leh nau te pen Gam tuamtuam kipawlna pan zong ki thutuakna leh amaute panpihna te kiam sak kei un ci-in zong Pope in thum hi.
Ukrine, Kawlgam, Palestine, Israel leh gal ki do na mun te ah a om te ading, gam tampi te in gal kidona leh vai tuam tuam hangin gentheihna a thuak mite ading thu ngetsak nang in zong Pope in mi kim tungah hanthawn hi.
Ki lemna ding in cihtakna tawh thunget ding Pope in gen a, gal kido na in a tawntung in lel thei hi ci hi. Gal van a bawlte lungtang a kikhel nading in zong thunget nang leh amaute van bawl te in ki do ki thahna te panpih hi ci-in Pope in gen khia hi.
Source – Vatican News
Photo Crd.