Tonzang Khuapi ah JUBILEE Kum Muakna (19.1.2025)
Kalay Diocese pan Jubilee Kum tawh kisai vaipuak nei makaipi Rev. Fr. Peter Lian leh Sr. Monica Cing Ngaih Dim (LWST) te Zogam ah Catholic upna Khaici hong pokhiat masakna mun ahi Tonzang Khuapi ah Jubilee Kum Muakna a bawl dingin Kalay myo pan (17.1.2025) ni-in paito in Tedim, Saizang leh Tonzang Zone te pan Jubilee tawh kisai vaipuak nei Leitawhtan thuzuite acing akem Sia Joseph Cin Tul Kim in zong zui-in amaute makaihna tawh (19.1.2025) ni-in “Leitung leh I Gam ah Kilemna a Khan Semsem Nang Makaite ading Thungetsakna” cih thulu tawh amasa penin Jubilee kum muakna a Siangtho Missa Biakbiakna pen Tonzang Khuapi ah kibawl hi.
Tua sungah Tonzang Parish Priest Rev Fr. Titus En Za Khan in Missa Biakpiakna makaih in Rev. Fr. Francis Nang Ngaih Pau leh Rev. Fr. Peter Lian te in Concelebrant sem uh hi.
Missa Biakbiakna a man khit ciangin, “Leitung Kilemna ding thu tawh kisai Pope Francis’ laigelh (laikhak) pen Sia Joseph Kim in mipi maiah simkhiatna nei hi. Tua khitteh Jubilee Kum tawh kisai a theihhuai Pawlpi hongpiak zuihding thute Rev. Fr. Peter Lian leh Sr. Monica Cing Ngaih Dim (LWST) te in hilhcianna nei uh hi.
Mailam ah zong Kha khatin mun khatta ah Jubilee Vaipuak neite Jubilee Kum muakna Pawi bawl dingin Kalay Diocese sung Zone tengah pai-in tua khitteh Parish te ah zong hong pai kawikawi ding uh hi.
Lamet na tawh I khualzin na ah Pasian le mite tawh kilemin lungnop takin i manawt den zawh nang Topa Pasian in Jubilee thupha mikim tungah hong piata hen! Amen.
