Catholic Nisim Lungdamna Laisiangtho. Hun Nautaang Kaal (5) Na. 9.2.2025 (Sun)

Luke 5:1-11

Khatvei Gennesaret(a) tuilipi gei-ah Jesu a din laitakin a kim ah mihonpi hong kikaikhawmin Pasian’ thu a ngai uh hi.

Tua laitakin tuili gei a khawl gunkuang nih a mu hi. Nga bengte gunkuang sung panin paikhia uh a, a ngeente uh a sawp uh hi.

Gunkuang nih lak pan Simon’ gunkuang tungah Jesu a kahtoh khit ciangin, gunkuang tuipi gei pan tomno a kihalna dingin a gen hi. Tua ciangin gunkuang tungah amah tu-in mihonpite thu a hilh hi.

A thuhilh a man khit ciangin Jesu in Simon’ kiangah, “Ngasa na mat theihna dingin tui thukna ah na ngeen paai in,” ci-in thu a pia hi.

Simon in, “Sia aw, kote in zanthapaai-in ka hahkat uh hangin ngasa khat zong ka man kei uh hi. Ahi zongin thu nong piak leh, ngeen ka paai ding hi,” a ci hi.

Amaute in a thupiak bangin ahih uh ciangin ngasa tampi awk ahih manin a ngeente uh kikek dektak hi.

Tua ahih manin adang gunkuang khat a om, a lawmte zong hong pai-in hong huhna dingin amaute in a khut uh van a, amaute hong pai-in gunkuangte gel sungah a koih uh ciangin dim lua ahih manin a tum dektak hi.

Simon Peter in hih thu piang a muh ciangin Jesu’ mai-ah, khukdin-in, “Topa aw, ka kiang pan paikhia in, bang hang hiam cih leh keimah in mawhnei mi ahi hi!” a ci hi.

Bang hang hiam cih leh amah le a pawlte khempeuh in tua zahta ngasa a mat uh lamdang a sa uh hi.

Tua bang mahin Simon’ kithuahpihte ahi Zebedee’ tapa James le John-te in zong lamdang a sa uh hi. Tua ciangin Jesu in Simon’ kiangah,“Lau kei in; tu-a kipan mite na man ding hi,” a ci hi.

Amaute in tuipi gei-ah a gunkuangte uh a khawl sak khit uh ciangin, a neihsa khempeuh uh nusia-in Jesu’ nung a zui uh hi.

Hi in Topa’ Lungdamna Laisiangtho ahi hi.