Catholic Nisim Lungdamna Laisiangtho. Holy Saturday. 19.4.2025 (Sat)

Luke 24:1-12 1. Nipikal ni masa penni, zingsang phalvak tungin numeite amau bawlkholhsa paknamtuite tawi-in hanah a hawh uh hi. 2. Han vang pan suangtum kilikkhia a om a mu uh hi. 3. Ahi zongin a sungah a tum uh leh, Topa Jesu’ luang mu lo uh hi. 4. Amaute in hih thute hangin lungmangin lamdangsa-in a om laitakun, puanpak a silh mi nih thakhat thu-in amaute’ kiangah ading uh hi. 5. Numeite lau lua mahmah uh ahih manin lei lakah a boksuk uh hi. Ahi zongin tua mi nihte in amaute’ kiang ah, “Note in bang hangin a nungta mihing, misite’ lakah zong na hi uh hiam? 6. Amah hih laitak ah om nawn lo hi; amah thokik zo hi! Amah tawh Galilee gama na om lai-un note’ kiang ah, 7. ‘Mihing’ Tapa mawhnei mite’ khut sungah kipia dinga, singlamteh tungah kithat ding hi, a ni thum ni-in a thokik ding hi,’ ci-a hong gen phawk un,” a ci uh hi. 8. Tua ciangin amaute in zong ama thugente a phawk kik uh hi. 9. Han pan paikhia uh a, tua thu khempeuh sawm le khatte a kipan adang khempeuhte’ kiangah a ko uh hi. 10. Nungzuipite’ kiangah hih thu a puakte in Mary Magdalene, Joanna, James’ nu Mary le amaute tawh a omkhawm numei dangte ahi uh hi. 11. Ahi zongin nungzuipite in tua numeite’ thugente uphuaisa lo uh ahih manin um lo uh hi. 12. Ahi zongin Peter dingin hanah a tai hi. Amah kunsukin a et leh, saihadial puan bek a muh ciangin tua banga thu piangte lamdangsa-in inn ah a ciah hi. Hi in Topa’ Lungdamna Laisiangtho ahi hi.