Mihing Leh Mihing Tungah Mawh Sut Ding Mah Ahi Hiam
- Himah hi banghanghiam cih leh Topa Jesu in mihing te tungtawnin leitungah mawh maisakna hongpia ahih manin leitungah ama ii Aana apiak mihing te tungah mawh ih sut ding kisam hi. Topa Jesu in mawhmaisakna pen vantungah pua to lo-in leitungah ama phuhsa Pawlpi a nungzuipite tungah nusiat hi cih pen (Mt 18: 17-18) na sungah teltakin kimu thei hi.
- Topa Jesu in a Pawlpi leh a Nungzuipite tungah “lei ah na hen peuhmah uh vantung ah kihen dinga, leitunga na phel peuhmah uh vantungah kiphel ding hi” ci-in limtakin vaikhak ahih manin leitungah Topa Jesu nungzui ahi Siampi te tungah mawh a sutlo peuh mah in Vantungah mawh maisakna ngah neilo ding hi cih phawk ciat ni.
- Mawhsutna pen Topa Jesu thu man na hi-in, lei ah Topa Jesu piak Aana nei Siampite tungah mawh a sut nuamlo te pen Topa Jesu thu amanglo te leh Laisiangtho Pasian kammal a nial te ahi uh hi.
- Mihing leh mihing tungah mawhsut nuamkeng, Pasian kiang bek ah Direct in sut ning ci-in leitungah mawh a sut nuamlo te pen (Lk 16:19-31) na sunga Mihaupa in Abraham kiangah “ka sanggamte hih gim thuakna mun hong tun lohna dingun Lazarus va hilhsak in” a cih teh Abraham in “Amaute kiangah Moses leh Kamsangte om uh hi, tua te thu ngai ta uh hen” a na cih ziau mah tawh kibang hi.
- Tua ahih manin leitungah Topa Jesu Aana piak a nungzuipi ahi Siampite kiangah mawh a sut nuamlo te aa ding vantung panin Topa Jesu hong kumsukkik nawnlo ding hi cih phawkin leitungah Topa Jesu tangin mawh maisakna a pia thei Pawlpi leh Siampite koi ah om hiam cih zongin a manlangin tua te tungah mawh ih sut ding ki sam pha mahmah hi.
- Topa Jesu in ama kiangah Direct in mawhsut ding deih hi zenzen leh a Pawlpi leh a Nungzuipite tungah Mawhmaisak theihna ding Aana cik mah hunin pia ngeilo ding hi cih thu limtak in phawk ciat ni.
- Mawh ih sut ciangin Pawlpi sungah Siampite tungtawnin Topa Jesu kiangah a ki sut hi-in tua mah bangin mawh maisakna zong Topa Jesu in Pawlpi sungah Siampite tungtawnin a hongpia ahih lam phawk ciat ni.
- Pa Pasian in a Tapa Topa Jesu zong Mihing mah ahi Tonu Maria tungtawnin leitung mite tungah a hongpiak mah bangin Topa Jesu in zong Vantung gam kong honna tawhtang ahi Sacramentu te pen mihing mah ahi a Nungzuipite tungtawnin ei leitung mite tungah hongpia hi cih phawk ciat ni.
- Tua ahih manin Siampite tungtawnin in ihngah Sacramentu te khempeuh (Tuisawpna, Mawhsutna, Kiteenna, ect.,) cih te pen Mihing tung pan a kingah hilo in Topa Jesu tung pan a kingah a hih lam phawk ciat ni.
- Sanggam Christian te sung pan Pasian thu a telcianlo Pastor pawlkhat te in Mawhsutna pen “mihing leh mihing mawh kisut, mihing leh mihing mawh maisakna a kipia” ci-in gensia na pin Tuisawpna a kipiak ciangin mihing leh mihing Tuisawpna kipia ci nawnlo-in Pasian kiang pan Tuisawpna ngah ci leuleu uh hi.
*Tua bang ziauziau in upkhialh ding hi peuhmah lo hi. Tuisawpna, Mawhsutna cih te a ki pan a dang Sacramentu te khempeuh pen mihingte tungtawnin Topa Jesu hongpiak vive ahih lam phawk ciat ni.
- Tuisawpna ciang Topa Jesu tungpan Direct in sang ning ci tuanlo in mihing tung mah pan a sang te in Mawhsutna zong mihing tung mah pan ih san ding ki sam hi cih thu phawk ciat ni.
- A tawpna ah Siadaw ih hi zong, Siampite ih hi zong, thuzuite ih hi zong, mi khat peuhpeuh in leitungah mihing ahi Topa Jesu sawltak Siampite tungah mawhsut lo-in vantungah mawh maisakna ngah ngeilo ding hi cih phawkin mawh sut kim ciat ni.
By- Fr. Joseph Zo Mung
