Catholic Nisim Lungdamna Laisiangtho. Easter Nipi Kaal (2) Na. 28.4.2025 (Mon)

John 3:1-8

1. Tu-in Jew mite’ makai khat ahi Nicodemus kici Pharisee-te’ lakah khat a om hi. 2. Amah zanin Jesu’ kiangah va pai-a, “Rabbi aw, nangmah in Pasian kiang pana hong pai sia khat na hih lam kote in ka thei uh hi. Bang hang hiam cih leh na bawl na lamdangte Pasian in a ompih mi longal kuamah in bawl thei lo hi,” a ci hi. 3. Jesu in ama kiangah , “Ken a man takpi kong genin ah, mi khatpeuh in tung lampan a suahkik kei leh Pasian’ gam mu thei lo hi,” a ci hi. 4. Nicodemus in, “A khangham khinsa mi khat bangci suahkik thei ding ahi hiam? A nu’ gil sungah lut kikin suakkik thei ding ahi hiam?” a ci hi. 5. Jesu in, “Ken a man takpi kong genin ah, tui le Kha Siangtho tawh a suakkik lo peuhmah, Pasian’ gam sungah lut theilo hi. 6. Si-le-sa a, a suak mi in si-le-sa hi a, Kha Siangtho-a a suak mi in kha ahi hi. 7. Note tunglam pan na suakkik ding uh hi, kong cih ciangin lamdang na sa kei un. 8. Huih in ama utna peuh ah a nung hi. Huih ging na zak hangin koi pan hong pai a, koi ah pai ding cih na thei kei hi. Kha Siangtho tawh a suakte peuhmah tua bang ahi uh hi,” a ci hi.

Hi in Topa’ Lungdamna Laisiangtho ahi hi.