Diamond Jubilee at Laaitui Village (17-18.5.2025)

Laaitui Khua ah Catholic Upna Khaici akivawh zawh kum (75) cinna Diamond Jubilee Pawipi pen Rev. Fr. Joannes Cin Sian Langh Thang vaihawm siamna tawh May kha 17 ni-in zintungin 18 ni-in Jubilee Missa Biakpiakna Kalay Diocese hongcing hongkem Bishop Felix Lian Khen Thang makaihna tawh nasiatakin kibawl hi.
May 17 nitaklam nai (4:00 pm) in Biakinn huang kongpi pan Siadawpa vaidawnna nasiatakin ni bawl hi. Nitak simin lenkhopna nasiatakin kibawl hi. Nipini zingsang nai 9:30 in Biakinn tual ah Jubilee Mualsuang thupha piakna, Jubilee Pawi ala mi (12) te tung pan Zam (75) vei tumna le Jubilee Lapi saknate kinei-in tua khitteh Missa Biakpiakna kipan hi.
Missa Biakpiakna hun sungin naupang mi (100) kim in Christma Hanthotna sang uh hi. Missa Biakpiakna a man khitteh Jubilee Pawi a la mi (12) te Pahtawina laipi piakna kinei-in hun man teh man kilaakna kinei hi.
Nipini nitak lam nai (1:30 pm) in Jubilee a la te pahtawina pawi hun khat kibawlin tua khitteh nitak nai (5:30 pm) in Benediction Siangtho Pumpi Biakna le khikhinna kinei hi.
Hih Jubilee Pawipi sungah Siadawpa le Siampite a kigawm (14) le Khual pan mipi (260) pha-in Khuasung pan mipi tul val kipha hi. Pawi sungin Sial (8), vok (4) le Ak luang tampi kigo hi.
Pawlpi Makai pa in Sial a phei mei bang khat Siadawpa letsongin a piak kawmin a mei a banna pen hong van in cihna hi-in a khe cin a piakna pen hong siksik in cihna hi ci-in genkhiatna nei hi. Tua banah Siampite le Nungak Siangthote zong Jubilee Satan bak golpi khat tek pia uh hi.
Jubilee Pawi i bawl ciang le i sim ciangin Jubilee thupha i ngah nadingin a thupi penpen in Mawhsutna (thuumna) le Mawh kimaisakna hi ci-in Rev. Fr. John Lian Cin Pau in nitak kha-an vakna sungah hilhcianna nei hi.