I gam le lei kepsiam ni

I pu i pa te hun lai a hi, Mangkang te hong uk lai pan 1980 ciang dong, i zogam pen singkung lianpipi te tawh niim dildial in a et lawm mahmah bek tham lo in, vasa, innsa, gamsa te tawh nop ci mah mah hi. Laphuak siam ten, et lawm Zogam nim dildial ee, a na cih mah bang in singkung lopate zong tam in khua hun zong man in teen nop huai mahmah hi. A hi zongin 1990 khit ciangin abeisa aa, singkung lian pipi ih cih te pen hong bei sem sem in, tun a hih leh i Zogam pen khua khal lai tak bang in keu gaw gam tawh kibang in lunglen huai mahmah ta hi.

opfawm lam pan ahi zongin, kumpi lam pan ahi zongin, i gam bang ci kep ding gam hal lo ding, sing phuk lo ding hong cih i ngak sangin ei a mun agam aa om, a teng, gam mi ten i it ding leh i kep siam ding thupi pen hi. Minam dang teen ei mun ei gam hong it sak hong kep sak lo ding hi. Guah tui bei in phalbi leh khukhal hun hong tun ciang kisam lo pi aa i gam hal tum mawk pen ei Zomi te ii ki sap na pi pen hi. I gam i hal tak teh sing kung lopa teng pen vut leh vai a suak hi mawk hi. Tua te guah hong zuk teh tui in tai a hih man in kawlzang lam, kawlgam nuai lam aa teeng ahi, Irawady lam te a ding in ek lei a puak puak hi gige in ei gam a ding teng a susia tum te i hih lam ki thei lo hi hang.

I gam ah singkung leh lopa om nawnlo a hih man in khua hun zong hong man nawnlo pah hi. Singkung om kei leh bang ci guah zuk mawk ding hiam. Singkung lopa om kei leh, koi lai pan tui ngah mawk ding i hi hiam. Kawl ten Owk[lonf awmudk rSD\ a  na cih pen man mah mah hi. Khua hun in i gam i lei a om singkung lopa te tung ah a ki nga na hi gige hi. Singkung lopate ki hal tum mang a hih man in guah a zuk ciang guahtui a hup ding singteh lopa keu te omlo ahih man in hawk tui in luang in, tui hong khang baih pah hi. I mual i keen te ah, sing teng ki phuk khin ta a hih man in, a nuai ah singkung a zung a man ding om nawnlo a hih man in, guah hong tam ciang miin hong ki cim pah in i lo i lei te hong kisia hi pah hi. Guah a zuk ciang a hup ding a dal ding om lo a hih man in hawk tui ten i ek lei za om sun sun ding teng tai khin ta a hih man in kum khat tawntung i lo khawh na te ah, a piang ding zah hong piang nawnlo a hih man in  i nuntakna haksa sem sem hi. Tua ahih man in, kiim leh paam kep siam ding vai puak pen leitung mi khempeuh te wm0ef vaipuak hi. A diakdiak in ei mun ei gam ei lei, en i kep a, i it kei leh mundang gamdang a om miten, minam dang ten hong kep i it sak lo ding hi. Minam dangte i cih pen a mau i met na ding, ngah na ding om kei leh ei kiangah, bangmah hong semlo ding uh hi.

Tua a hih man in tuni in ei Zomi te sianvontawi ten i gam i lei kep siam ni, puah ni, zuun ni. Et lawm sak ni. A susia te hi kei ni. I Zogam pen singkung lopa tawh a nim dil dial innsa gamsate tawh a et lawm gam hi sak ni. Gamsa tuamtuam te zong beng in kap lup ding na hi lo hi. I kep dingin Pasian in hong piak hi zaw hi. Piancil LST 2:15 sung ah, Topa Pasian in mipa la in, Eden huan kho-in a kem ding in a koih hi” na ci hi. Pasian bawlsa Eden huan a hi i teenna leitang leh a sunga om te pen i suk siat ciang Pasian bawlsa nate a susia i hi gige hi. I ki sapna ah zat ding in hong piak hi mah hi. A hi zongin a val lua, leh a ki sam lo pi in, ei ang sung ding bek ngaih sun in Pasian bawlsa singkung lopate ganhingte susia nawn kei ni. Puah ni. Hah ni, suan ni, keem ni. I zogam et lawm sak ni. I zogam zuun ni. Pasian thu um vive i hih mah bang in, Pasian leh a ma bawlsa te it ni. Kepsiam ni ci-in itna lianpi tawh RVA Tedim tongluan pan kong zawn uh hi. Lungdam hi.