The Solemnity of Sacred Heart Church, Phai (29.6.2025)

Phai, Siangtho Lungtang Parish acing akem Rev. Fr. Damian Dal makaihna tawh Phai aa om thuzuite in a Biakinn Pawi (Siangtho Lungtang Pawi) pen nung nipi ni (29.6.2025) in nasia takin bawl uh hi.
Tua sungah Rev. Fr. Joseph Zo Mung in Topa Jesu Siangtho Lungtang Pawi ih bawlna pen Topa Jesu mah bangin itna leh hehpihna nei ding cihna ahi hi. Tua a hih manin no hih Siangtho Lungtang Biakinn ah a kikhawm den thuzuite in na innkuan sung, na Parish sung uh leh note khat lekhat tungah itna leh hehpihna na kilak den un tua hi leh ih Pawibawlna tha man om pan ding hi ci-in thuhilhna nei hi.
Tua banah Nungzuipi Peter leh Paul te pawi ni zong ahih manin Peter leh Paul te in kipumkhat takin na a sep khopna thu zong etteh theih dingin hilhcian na nei hi.
A tawpna ah Pawlpi ii a thupitna leh a thu neihna pen Paul ii Nungzuipi a suahna tung tawn in nakpi takin kilang hi ci-in gen hi.
Ama gen na ah St. Paul pen Topa Jesu tawh ki mu kha ngeilo in Topa Jesu ii a teel Nungzuipi (12) lak ah zong kihel lo hi. A hi zongin Paul pen Peter kiangah ni (15) bang om in Peter leh Nungzui dang te ii teelna, khutngakna hang tawh Nungzuipi suak pan hi. Tua ahih manin amah pen mangkam in (Late Apostle) kici hi. Tua ahih manin Peter leh Pawlpi ii thuneihna Aana hang tawh St. Paul pen Nungzuipi a suak hi ci-in hilhcianna nei hi.
Tua ni pen Siampi (3), Deacon (1) leh thuzuimi tul val bang kikhawm in tha kingah mahmah hi.
Kikhop man ciang Parish mintawh a kikhawm teng Bawngsa tawh Sun an ki vak hi.