TATE IN NU LE PATE’ ITNA TELKHIAL THEI

RVA Zomi Tedim Service aza angai nu le pa u le naute aw tuni Innkuan nuntak zia cih Thulupi nuai-ah Sia John Kap ii gelh ahi, TATE IN NU LE PATE’ITNA TELKHIAL THEI cih thu hong hawm sawn ning.
Ta dinmun ah i-om laitakin Nu le Pate’ hongitna kitelkhial baih mahmah a, Nu le Pa tungah kikhasia baih mahmah hi. Hong itluatna uh itelna in hong nehnosakin hong khasiasak baih ahi hi. Khangno ihih laitakin innkuan sung haksatna te kitheikhin hetlo hi. Nu leh Pate’ kiangah sum ideih zahzah inget laitakin Nu le Pate in leiba ahauh mahmah laitak khawng uh na hithei gige hi.
Atate uh nikten puansilh hoihpen mah hong silhsak nop uh hangin leiba tamlua ahih manin hongguan ngamlo uh hi. “Leiba zong dim zo ngap lo, atate uh puanhoih pipi silhsak” a kicih khak ding amaizum hun nangawn uh om thei hi. Innkuan sung haksatna khempeuh Nu le Pate in thuak khinkhian uh a tate hong theisak ngamlo uh hi.
Tua bangin innkuan sung haksatnate thei khalo nahih manin nang deihzah sum hongpiak zawhloh uhciangin khasia pah kei-in. Nang nget zah hongpiak zawh kei uh leh zong kikhasiasak in khitui luangpah se kei-in. Kitom gawp hang gawp sa-in innpanin na taikhiat ciangin na nungah na Nu le Pa bangzah takin a lungsim uh na ahi hiam cih phawk in. Nu le Pa in khua-ul khuasa kai-in a thalawhsa uh sumleh paai khempeuh nang mah hongkhualna uh hi a, nang ading in na khatbeek itsik lo uh hi.
Neih le lamh kicing hi peuhmah leh mi a sangin a hoihzaw tham hong guan nuam uh hi, cih phawk gige inla mi nek sangin zong alimzaw hong nesak nuam uh hi, cih mangngilh ngei kei-in. “Sum om nai kei,” hong cih uh ciangin zong umpah lel in. Na lawm nagualte lakah puan hoih lo penpen nasilh ciangin nang sangin na Nu le Pa in na sazaw hi.” Nikten puansilh hoih nong guatloh uh hongit kei lua uh teh” ci ngei kei in. Tua bang nacih khak leh na Nu leh na Pa’ lung tang siktul tawh a sun liam niloh na suak ding hi.
Khat veivei ciangin sum om gige napi, hong pia nuamlo uh hi nacih hun zong om khathei ding hi. Innkuan khat sungah sumzek nading tampitak om den hi. Sum neih khempeuh nangdeih pen lei nadingin kizang leh akicin hun zong omkha mah ding hi. Ahih hangin nanek nadawn ding zong kisam a, na sangsap ding zong kisam hi.
Inn le lo neih zawh nadingin sum le paai cil mahmah akul hun zong om thei hi. Om gegu napi hong kipiakloh ciangin zong nang hong kikhualna mah hi veve hi. Nang deih teng hong piak lohna uh pen na Nu le na Pa in nang hongit luatna uh hizaw hi cih telsiam tawntung hi.
Khat veivei ciangin na utna khempeuhah hong paisak loin hong kihelsak lo kha thei ding uh hi. Tua bang hun ciangin tate in Nu le Pa’ itna telkhial thei hi. Nang ut bangin hong zaankhah le uh zu le sa, khamtheih guihtheih tawh na kidiah pah ding aa, AIDS natna vei-in na khansih lel ding hi. Tua bangin hong khahzau loh nangawn uh asia mahmah khangno tampi mah i-om lai veve hi.
Zo ngeina zangin Nu le Pate in numei peuhmah nitak vak ding hong khamcip nangawn i zawlgai zolai veve hi. Leitung thute ah suakta semsemin kikhah zau semsem leng mawhna le minsiatna mindaina tam semsem hi. Ahih hangin Pasian thu ah suakta semsem leng gamtat hoih semsemin kiminpha semsem hi. Tua ahih manin na Nu le na Pa in na ut bangbangin hong zaankhah hetlohna uh pen nang mah hongitna uh hizaw hi cih phawk gige ni.
Ih Nu leh ih Pa kha siasak peuhmah lo-in a-it tawntung tanu tapate ih hih zawh nadingin ih biak Topa Pasian in thupha hong piakim ciat ta hen. Lungdam hi.