Educating Children under the Care of the Church’s Leaders at Sacred Heart Parish, Phai, Kalay Diocese (2021-2025)
Ih Myanmar Gam sung ah buaina a hong pian ciangin a diakdianin ih Zogam ah Kumpi Sang teng leh summet bawlna tawh Sang hong tengin avekpi phial in sang khak uh a hih manun ih nau pangte pilsin nading omlo in cimawh thei mahmah uh hi.
Tua hun sungin galtai te leh sum neilo mite aa ding deihsakna tawh Siampite in amaute omna mun Parish ciat ah (Informal School) ci-in Laitheih nading bulphuhin pilna ki pia hi.
Haksatna tampi om mah ta leh Siampite in a mau mun ciat ah deihsakna tawh hanciam tentan uh a hih manin (Informal School) pan in (Formal School) suaksak in Pilsinna a pia zo Kalay Diocese sungah mun tampi om ta ahih manin lungdam huai mahmah hi.
Minam leh Pawlpi deidanna omlo in cimawh huhna leh Pilna piakna pen Catholic Pawlpi in Tuni Ciangdong ki tatsat lo-in mikim aa ding a hoih khom khat sem zo den ih hih manin ih Biak Topa Pasian tungah lungdam ko ciat ni.
Pawlpi dangte sangin ih hauh zawk manin a ki samzo cih bang hi peuhmah lo-in Veina leh deihsakna ih neih manin Pasian ii hong ompihna tawh a ki sem zo a hih na thu phawkin na hoih ih sep te, ih kep cing zawh nang hanciam ciat ni.
Hih man te pen Phai Parish Priest Rev. Fr. Damian Dal in ama nasepna te a Fb tunga a post na pan a ki lakik ahi hi.
A mah in a nasepna tawh kisai-in ama Personal Fb ah hih a nuai aa bangin lai na gelh hi.
Tua te in ” Pilsinna siamsinna cihte in naupang khat adingin ngahloh aphamawh thute ahihi. Gamsung buaina tampi hongpian ciangin naupang tampi takin pilsin nading, siamsin nading neinawnlo uhhi.
Neih le neihloh, siam le siamloh cihte hinawnlo in, naupangte laisin siamsin theihna seploh bawlloh hong phamawh ta hi.
Hih thu hangin Sacred Heart Education Centre (SHEC) cih min tawh khuasung khuakim naupangte le galtai cimawh naupangte pen Home Education dan in lai kisin pih hi.
Kumkhat khit ciangin mi tamlua mahmah ahihman in Home Education panin School Level in kipai pih a, tu in kum li na hita hi.
Kumkhat in sangnaupang 300-460 kikal kinei den a, 2023-2025 ciangpen galtai cimawh genthei naupang pilsinte pen amawkna in kikah sak hi.
Tukumpen sangnaupang 380 (KG-G9) kinei in, sia/siama (16) in hong hilhsak hi.
Leitungah athu a gentawh manlo in, seploh aphamawh thu pawlkhat om hi; tua sungah pil nading nasepna, cidam nading nasepna te in apeelmawh te ahihi ” ci-in na gen hi.
