Catholic Nisim Lungdamna Laisiangtho. Hun Nautang Nipi Kaal (15) Na. 19.7.2025 (Sat)

Matthew 12: 14-21

14. Ahi zongin Pharisee-te paikhia uh a, Jesu a thah theihna dingin a kikumsim uh hi.
15. Jesu in hih thu a theih ciangin, tua mun panin a paikhia hi. Mi tampi in amah zui uh a, cina khempeuh a damsak hi.
16. Ahi zongin hih thute a genthang lohna dingun amaute a kham hi.
17. Hih in kamsangpa Isaiah’ tungtawnin a gen thu a tangtunna ding ahi hi:
18. “Ka teelsa ka nasempa, ka lung hong kimsak, ka it mahmahpa en un. Ama tungah ka Kha Siangtho ka pia dinga, amah in Gentile mite’ tungah thuman thutanna thu a tangko ding hi.
19. Amah in kuama thu seel loin, otsan lo dinga, kongzing lakah zong kuamah in ama awging za lo ding hi.
20. Amah in a kituancilsa pumpeng kuaitan lo dinga, a mit dektak mei sumit lo ding hi. Thuman thutanna in a uk matengin a nasep khawl ngeilo ding hi.
21. Gentile mite in ama min muangin a lamen ding uh hi,” a ci hi.

Hi in Topa’ Lungdamna Laisiangtho ahi hi.