Nulepa le ta/tanu ki-itna

Nulepa itna in manngenlo itna ahihi. Manngenlo itna ahihhangin mannei lo itna cihna hilo a, man kiciangtan zolo ahihman in man akingenlo itna ahihi.

Leitungah itna cih kammal pen namtampi in kikhia in, lamtampi tawh kilak hi. Ahizongin itna akici khempeuh in itna taktak ii limlakkhia zolo in, lakkhia thei lo hi. Banghanghiam cihleh itna cih kammal pen mitampi te in, PAULAP in nazang uhhi.

Itluat man in vua kha, itluat manin gensiasia kha, itluat man in phunsansan cih ahizongin; itlua in koimah paisak ngiatlo, itlua in kuamah tawh kiho saklo, itlua in kosiasia, itlua in muangngiatlo, itlua in nasawlsawl, itlua in eideihbangbek gamta leh uut cihbangin namtampi om hi.

Tuate khempeuh pen itna hilo zaw in, itna cih kammal pen PAULAP in azangbek ahi uhhi.

Itna paulap a azangmi pen kidawphuai mahmah hi. Banghanghiam cihleh eite tungah hongbawl nate uh itluatman in hongbawl in kingaihsun uh ahihman in, kisikkik ngeingiatlo uhhi.

Nupa (numei khatleh pasalkhat) khat in ta lilenga giatlesawm cihbang in nei in, mipil milian mah nasuaksak zohi. Ata atanu te uh mite tawh liangko kikim dingmah in nakoih tozo uhhi. Ahihhang ta/tanu lilenga in nulepa ahi minih pen enzolo, vanzolo, vehzolo, khoizolo thei hi.

Banghanghiam cihleh itna akibatloh man ahihi. Nulepa te in anektang hongpia in itngam in, asilhtang hong silhsak ngam a, einattangin amau nangam hi.

Himah taseleh ta/tanu te in ahihleh ei kimasak in, nulepa i-nunun khazel hi. Manngenlo itna pen mannei lo itna sakha i-dinghiam cihthu ngaihsut kikkik ding thuhoih khat ahihi.

Manngenlo itna in tammanlua ahihman in, manngenlo itna thupisalo in, simmawh khakna in, mannei itna hong ngahsaklo hi.