Living Rosary Prayer Group Celebrates Feastday of St. Philomena at St. Philomena Chapel (10.8.2025)

A nungta Khithungetna kipawlna sunga a kihel thuzuite in tuni in Sts. Pater & Paul Parish huam sunga om St. Philomena Biakinn neu khat sung ah Misiangtho Philomena ii pawi noptak in bawl uh hi.
Tua sungah Missa Biakpiakna pen Rev. Fr. Joseph Zo Mung in makaih in Rev. Fr. Mark Khai Dal in Pasian kammal tawh kha-an vakna nei hi.
A mah in Misiangtho Philomena ii Pasian tungah Siangtho takin a ki piak khiatna manin bawlsiatna a thuakna, Pasian a upna, Tonu Maria ii a huhna, Misiangtho a suah zia te leh Living Rosary Prayer Group te tawh a kizopzia te limtakin hilhcian na nei hi.
Missa Biakpiakna a man khit ciangin Rev. Fr. Peter Lian in tu kum Jubilee Kum a hih manin Jubilee tawh kisai a theih huai thu te leh Indulgentia a kici mawhna daan pan maisakna ngahna tawh kisai hilhcianna nei hi.
Hun man ciangin Living Rosary Prayer Group sunga a kihel member teng leh Siampite man kilakna ki nei-in tua khitteh အလှူရှင် te piakkhiat na tawh buhcim leh aksa a kikhawm tengin ki ne khawm hi.
Tuni pen Living Rosary Prayer Group sunga a kihel member te banah hih pawi a lunglut thuzuite zong ki khawm uh a hih manin Missa Biakpiakna sungah Siampi (3) leh thuzuite 160 kim kikhawm thei-in tha ki ngah mahmah hi.