St. Monica Pawi Ni Tahan St. Theresa Biakinn ah Nupite Tintan Kipia (27.8.2025)

Tahan St. Theresa Parish acing akem Rev. Fr. Kap Tung Nung vaihawm siamna tawh Nupite ii a belh uh Misiangtho Monica zahtakna in ama Pawi ni, August 27 ni-in Tahan St. Theresa Biakinn ah Pasian thu sinna Tintan noptak in ki bawl hi.

Hih tintan pen COVID -19 leh ih gamsung ah buaina hongpian khit, a khat veina hi-in Nupite Tintan om lohzawh kum (5) bang hita a hih manin ki lawp phadiak hi.

Hih Tintan pen Rev. Fr. Joseph Thang Nen Zo Mung (Director of Social Communication & RVA Tedim Chin Service) in “Misiangtho Monica Etteh In Bangci Bangin Nupi Hoih Suakthei Ding” cih thulu tawh Zingsang nai (9:00 AM- 12:00 PM) dong hilhcian na nei hi. Tintan kah Nupite pen mipite lametna sang tamzaw in (192) tak pha uh hi.

Fr. Joseph in St. Monica ii a migitna, a diktatna te leh ama thu ngetsakna hangin a tapa St. Augustine siatna pan kikhel in, a Pasal Mr. Patricius zong lawki pan Catholic upna ah kikhelna ngah a hihna thu te gen in Nupite in a Pasal te uh leh a Tate uh aa dingin thu angetsak nangun hilhcian na nei hi.

Tua banah Innkuan ii thupitna pen Vatican Nihna sunga Pawlpi hong hilhna te leh Pope St. John Paul II hilhna ahi “Innkuan khat pen Pawlpi Neu khat hi, Pawlpi pen innkuan sung pan a ki pan khia hi” cih thu te bulphuhin Nupite in tate pattah ding a kisapna thu “Naupang khat a neu lai-in lamman zuisak la cin a tek dongin lam pial lo ding hi” (Paunak 22:6) cih Pasian kammal tawh hilhcianna pia hi.

Tua banah innkuan nuntakna leh Kiteenna Sacramenttu san ding ciangin limtak in kiginkholh ding thu a hilhna ah “Nu le Pa te in Nu Le Pa suah theihna dingin Tintan kah lo, Laivuanna omlo pi-in Nu le Pa suak uh ahih manun innkuan sungah picin na a om zolo hi” ci-in gen hi.

A mah in Kiteenna Sacramentu Sanma in theih ding a thupi mahmah Pawlpi ii hong hilh ahi “(The Nature of Marriage is Unity and Indissolubility) Kiteenna ih cih pen ki pumkhatna leh kikhen theihlohna hi” cih thu leh “(The purposes of marriage) kiteenna ii ngimna te pen 1. Khat le Khat itna tawh ki lungkimsakna nei ding 2. Tanu tapa neihnopna lungsim nei ding leh 3. A maute sung pan a piang tanu tapa te nekledawn, silhleten, Pasian thu leh Pilna siamna te guan ding” cih thu te hilhcianna nei hi.

Tua banah Laisiangtho sunga Nupi minthang a hi “Tonu Maria, Ruth and Esther” te ii hoihna phatna te a etteh theih na dingun amaute nuntakna te zong hilhcianna nei hi.

Tua khitteh Innkuan sungah a tamzaw in buaina a piang thei den ahi Teek leh Mote kizopna te zong “Teeknu ih cih te pen amasa in Mothak hi masa hi tua khitteh Teeknu a suak panuh ahih manun Teekte in Mote tungah amau hunlai aa a tuahkhak thute phawk kik in telsiamna neih ding kisam hi cih thu leh Teekte in a ta Numeite uh Mohoih a suah na dingun hilh kholh ding kisam pha mahmah hi” ci-in hilhcian na nei hi.

A thukhupna ah “Nu ih cih pen tate aa dingin Sia masa pen ahi hi, tua ahih manin NU te in innkuan sungah amaute ii dinmun ahi tate limtakin makaih zo leh innkuan sung hong nopci in, ih Pawlpi hong khangto pah dinga, leitungah kilemna leh nopsakna picing tak in hong om ding hi. Sakhi a pi san a no san ci-in paunak ih neih mah bangin Nu te in Ta te hong pahtah siam un. Na tate uh zong Kiteenna Sacramentu a san ma uh limtakin Pasian thu Sinsak phot uh” ci-in vaikhakna nei hi.

Tua Khitteh Inntek Siampipa Rev. Fr. Joseph Kap Tung Nung in Tintan apia Siampi pa tungah lungdamkohna leh letsong piakna nei hi. Tua banah COVID hun pan ki pan to in gal vai tawh buai to lai-ih hih manin mipi kikaihkhop ding a hamsat mahmah kawmkal pan COVID khit tu-in amasa pen Nupite Tintan bawl thei ih hih manin ih Biak Topa Pasian tungah lungdam hi, Nupite zong upmawhna Sangin tam hongpai zaw na hih manun Papite in an leh meh lei thuah in huan kik a hih manun minnailo hi lungduai takin ngak unla Papite huansa sun-an ne lo-in kua mah na ciah kei un ci-in lungdamna thu pulaakna nei hi.

A banah Nupi Makainu in Tintan a pia Siampipa tungah lungdamkoh thugenna leh letsong pakna nei hi. Tua khitteh mipi lam pan Tintan sunga a kisin thu te dotna leh Siampipa tung pan dawn kikna hun tomno khat ki nei hi. A tawpna ah Siampite thupha piakna tawh hunte nuamtak in ki man siang hi.