Leitungin a gim a tawl ciangin ama vangikte a zang na dinginkhat veivei ama pumpi siing khia thei zel

Leitung i cihin Nu khat mah ahi hi. Lungduai hi, thuakzawhna nei hi, ki piakhia zo hi. Mihingte banah nuntakna nei te khempeuh, ama nungzang ah, ama ang sungah tawlnga sakin an leh tui tawh khoi in vak hi.

Ahi zongin ama thuakzawhna tha valin a ma tu le ta te in amah bawlsia uh hi. Leitung pan apiang na te a suksiat uh ciangin aman thuak zo nawn lo-in, a nunung ciangin kap (Tui khang) hi. Nasia takin hong awng (Huihpi) hi. Ama pumpi hong siingkhia (Zinliing) hi.

Amah a bawlsia, haksatna a pia te pen a diakdiak in pilna nei pen ahi mihing te ahi hi. Nuntakna nei ganhingte in tu dong ciang Pasian piansak bangin om uh hi. Amaute in khantohna nei lo a kicih theih hangin nalianpi pi suksiat neilo uh hi.

Mihingte in ahih leh lamdang takin a khantoh mah bangun leitung a susia te zong mihing te mah hi. A kisam zah ciang bek ne lo, dawn lo, khol lo-in a val pipi in zongin, bawlin, kikhel sakin, zatthangna te tawh nu leitung pen daan tampi pia uh hi.

Pasian piansak bangin a luang tui te, mun citengah khakin khol uh hi. Tua bangin hihna hangin tui om na mun khat leh mun khat ki thakim nawnlo hi.

A kisam sangin a vallua in singkungte phuuk uh hi. Tua ahih manin guahtui hong kep sak ding singkung kicing nawnlo hi.

Singkung, paakkung tuh te in mun hong la ta uh ahih manin bangzah in hoihin nasep hong zaangsak mah taleh khuahun a hoih nading amauten hong huh zolo uh hi.

Mawtaw pai nading bek hilo, mun khempeuh ah, mun pawlkhat te ah bang pen khua sung bup phialin kattaya, congaret te ki phah ahih manin ahi bangin tui te leisungah lut thei nawnlo hi.

Mehteh mehgahte, inn khawi ganhingte zong ama zia in khangto sak lo-in, hun tomno khat sungin a khangkhia dingin a tuamtuam in ki bawl hi.

A sukpenpen in haksat gentheihna athuak mi tampite lakah mithat theihna van a tuamtuam te, leitung a susia thei van tuamtuam te ki bawlin mihing khat leh khat kido in kithat uh hi.

Hi bangte Nu leitung in bangci thuak zawh ding ahi hiam?

Pasian in a hoihin a piansak leitung pen ahoihzaw in a bawl dingin Pasian in mihingte sawl lo hi. Mihingte vaipuakin susia lo ding, a kisiat loh nadingin kemcing ding cih bek ahi hi.

Mihingte in a hoih zawk nadingin a bawl hi ung ci-in a tuamtuam a hih uh ciangin leitung kisia zaw hi.

Nu leitungin thuak zo nawnlo ahih manin awngin kapin, hong ki tom ciangin na khempeuh ama dan in hong piang hi.

“Bang hang hiam cih leh, Pasian’ haina in mihingte’ pilna sangin pilzaw a, Pasian’ thanemna in mihingte’ thahatna sangin a hatzaw hi.” (1 Cor 1: 25)

Pasian piansaksa leitung leh leitung a omte, i thupi bawl ciangin leitung zong a lungdam ding hi.

Leitung ah kilemna om ta hen. Peace on earth!