Catholic Nisim Lungdamna Laisiangtho.Hun Nautang Nipi Kaal (33) Na.22.11.2025 (Sat)

Luke 20:27-40

27. “Thawhkikna om lo hi,” a ci Sadducee-te kimkhat thu dong dingin Jesu’ kiangah a pai uh hi.
28. Amaute in, “Sia aw, mi khat in zi nei a, ta nei loin a sih leh, a nau in a zi luah henla, a u’ khang kizom ta hen, ci-in Moses in laigelhin kote hong hilh hi.
29. Tu-in unau sagih a om hi. A upa pen in zi nei a, ta nei loin a si hi.
30. Tua ciangin a nihna pa tua khit teh,
31. a thumna a kipan a sagihna pa dongin teenpih uh a, ta nei loin a si uh hi.
32. A tawpkhakna ah tua numei zong a si hi.
33. Tua ahih leh, thawhkik ni ciangin tua numei in amaute’ lakah kua pen’ zi ahi ding hiam? Bang hang hiam cih leh, tua sagihte in tua numei a teenpih uh hi,” ci-in a dong uh hi.
34. Jesu in amaute’ kiangah, “Tu hunin leitung mite kipi kiteengin a om uh hi.
35. Ahi zongin sihna pan thokikin hong tung ding tawntung nuntak nopsakna ngah dinga kilawmte kipi kiteeng lo ding uh hi.
36. Amaute vantung mite bang ding uh ahih manin si thei nawn lo ding uh hi. Amaute thawhkikna’ tate hi uh a, Pasian’ tate zong ahi uh hi.
37. Misite a thawhkikna ding thu tawh kisai-in Moses in, sawlbawk thu a gelhna ah, Topa pen, Abraham’ Pasian, Isaac’ Pasian le Jacob’ Pasian, ci-in a sapna thu tawh na lak hi.
38. Pasian in a site’ Pasian hi loin, a nungtate’ Pasian ahi hi; bang hang hiam cih leh, Pasian sungah mi khempeuh a nungta uh hi,” a ci hi.
39. Tua ciangin lai siangtho siamte pawlkhat in, “Sia aw, a kituak mahmahin na gen zo hi,” ci-in a dawng uh hi.
40. Tua ahih manin amaute in dotna dang amah a dong ngam nawn kei uh hi.

Hi in Topa’ Lungdamna Laisiangtho ahi hi.