Monthly Recollection of CRCK at Tahan (21.11.2025)
Tuni Kalay Diocese sunga om Religious tengin Pasian thu lungngaihna Tahan St. Theresa Biakinn pi ah noptak in bawl uh hi. Tua sungah Rev. Fr. Camillus Suan in Religious te aa ding a theih huai thu manpha te hilh cianna nei hi.
Tua khitteh Siangtho Pumpi Biakna leh Mawhsutna te ki nei hi. Mawhsutna teng a man khit ciangin Missa Biakpiakna ki bawl hi. Missa Biakpiakna pen Rev. Fr. Joseph Zo Mung in hong makaih in tuni-in a kisim lungdamna Laisiangtho bulphuhin kha-an vakna hong nei hi.
Amah in tuin Lungdamna Laisiangtho (Lk 19:45-48) na bulphuhin Topa Jesu in Jerusalem Biakinnpi a siansuahna thu thu hun laitakin Biakinn ih zat dan tawh genteh in hilhcianna hongpia hi.
Tua sungah “Pharisee te leh Laisiangtho siamte in Jerusalem Biakinn pi pen van zuakna, sum lei sumzuakna in a zat manin Topa Jesu tua te hawlkhia in Biakinnpi siansuah hi. Ka inn in thu ngetna inn ahi ding hi ci-in gen hi. Tu in eite ten zong a diakdiak in Nungak Siangtho te in Nipini in Biakinn pen van zuakna in ih nei thei kha hi. Kha vei vei Biakinn sung pen sumdonna mun leh thu kikupna mun, Gamvai, Minam vai gen na mun leh thu hoihlo tuamtuam kikupna mun in ih zangthei kha hi. Tua te kidop huai mahmah hi” ci-in a ki mu thei Biakinnpi ih zat khialhloh na dingin gen hi.
Tua banah “a ki mu theilo Khasiangtho teenna Biakinnpi pen ih lungsim ih lungtang sung ahi hi. Tua pen midangte in hong siansuah sak theilo hi. Ei leh ei-in ih mawhna te pan kisik kik in ih siansuah leh bek a siangtho pan ding hi. Tua ahih manin mawh ih sut ding kisam pha mahmah hi. Ih Biakinnpi pen Nungak Siangtho te in limtakin phiatsiang hi mah ta leh nin kik thei zelzel hi. Tua mah bangin mawh ih sut khit ciangin zong ih nitkik loh na dingin ih hanciam ding kisam pha mahmah hi. A zenzen in ih nit kik khak leh zong a manlangin mawh ih sut pahpah ding kisam hi” ci-in Biakinnpi sung leh ih Pumpi ih lungsim sung ih siangtho sak den nangin Fr. Joseph Zo Mung in hilhcianna nei hi.
Missa Biakpiakna a man khitteh inn teek Siampipa Rev. Fr. Joseph Kap Tung Nung ii vaihawm sakna tawh Tahan Parish pan a kipiakhia sun-an nekna noptak in ki nei hi. Hih Pasian thu lungngaihna sungah Siampite leh Nungak Siangtho te mi (40) kim ki pha hi.
