Closing Ceremony of Jubilee for Kalay Zone, St. Mary’s Cathedral, Kalaymyo (22.11.2025)
Tuni Kalay Zone sunga om Thuzuite khempeuh aa dingin Zone Level tawh Year of Jubilee khakna pawi nasia takin St. Mary’s Cathedral ah ki bawl hi.
Tua pawi pen Zingsang nai (8:00) panin mawh sutna tawh ki pan hi. Mawhsutna pen Siampite Sawm val in ngai in thuzui mite zong mawhsut tam mahmah hi. Mawhsutna pen nai khat kim bang ki sawt hi.
Mawhsutna a man khit ciangin Jubilee tawh kisai Diocese level in vaipuak a nei Rev. Fr. Peter Lian in Jubilee tawh kisai a theih huai thu te gen khiatna, hilhcianna hun tomno khat hong nei hi.
Tua khtteh Msgr. John Deng Cin Khup makaihna tawh Missa Biakpiakna ki nei-in Missa Biakpiakna hun sungin Rev. Fr. Robert Kam khaw Hau in kha-an vakna hong nei hi.
Amah in Jubilee Kum tawh kisai-in Jubilee thupha sang dingin Rome leh Piantit gam te ah a paina thu tawh kisai-in Jubilee pawi pi ii amanphatna thu limtakin hong gen khia hi.
Piantit gam Laudes Tonu suangbek ah a paina ah thuzuimi a tamna thu leh Tonu tui tawh a kisil mite in damna ngah in amah zong tua mun ah a kisil ciangin Tonu tung tawnin angah lungnopna thu te leh Rome Khuapi Vatican City ah Jubilee thupha a sang dingin a pai mi tampi om in tua mun ah a pai mite in Jubilee thupha a ngah na thu leh Jubilee thupha pen ih deih hun hun in a kingah thei hilo in a kipiak hun ciangin a ki piakna mun ah a pai kha te in a ngah thei bek a hih na thu te leh eite aa dingin Siadawpa in St. Mary’s Cathedral Biakinnpi ciamteh a hih manin tuni aa a kikhawm tengin Jubilee thupha a ngah ding a hihna thu te zong gen khiatna nei hi.
Tua banah Jubilee pawi ah Mawhna daan pan maisakna (Indulgentia) kingah ahih na thu te zong gen in tua indulgentia ih ngah theih na dingin mawhma pan kisik kikin Mawhsutna ih neih na ding leh Midang te ii mawhna te zong ih maisak ding kisam masa a hihna thu te zong limtakin gen in mipite in tha ngah thei mah mah uh hi.
Tuni pen Kalay Zone Level tawh Jubilee kum khakna a ki bawl hi-in hih pawi sungah Siampi (19) leh thuzuimi tulnga (5000) kim kihel uh hi. Diocese Level tawh Jubilee kum khakna pawi pen December kha bei ma deuh in Siadawpa makaihna tawh ki bawl lai ding hi.
