Catholic Nisim Lungdamna Laisiangtho.Hun Nautang Nipi Kaal (34) Na.24.11.2025 (Mon)

Luke 21:1-14


1. Jesu a khuadak toh leh, mi haute in biakinnpi sumkholna sungah amau sum a khiat uh a mu hi.


2. A zawng meigong numei khat in dangka tang san a neu nih a khiat zong amah in a mu hi.
3. Amah in amaute’ kiangah, “Ken a man takpi kong genin ah, hih a zawng meigongnu in midang khempeuh sangin tam a khiazaw hi.
4. Bang hang hiam cih leh, tua mi khempeuhte in a sum val lak panun a khia uh ahi hi. Tua numei in ahih leh, zawng napi-in a kivakna dinga a neih khempeuh a khia hi,” a ci hi.
5. Mi pawlkhat in suang meel hoihte le mite’ piakkhiatna tawh biakinnpi hoihtaka a kizepna thu a gen laitakun,
6. Jesu in, “Tua na muh uh nate khempeuh ahih leh, suang khat tungah suang dang khat beek kiciang lo a, a vekpi-in a kicipmang hun hong tung ding hi,” a ci hi.
7. Amaute in Jesu’ kiangah, “Sia aw, hih thute cik cianga hong piang ding ahi hiam? Hih thute hong tun kuan ciangin bang limin hong kithei ding ahi hiam?” ci-in a dong uh hi.
8. Jesu in, “Note kuamah in hong khem zawh lohna dingin na kikem un; bang hang hiam cih leh keima minin mi tampi hong pai ding uh a, keimah in tua pa ka hi hi. A hun hong nai ta hi,’ hong ci ding uh hi. Tua mite’ nung na zui kei un.
9. Gal kidona thu le langpanna ding gamlumna thu na zak uh ciangin na liinglawng kei un; bang hang hiam cih leh tua thute in a piang masa ding mah hi a, ahi zongin, beina hong tung pah nai lo ding hi,” a ci hi.
10. Tua ciangin Jesu in amaute’ kiangah, “Minam khat le minam khat, gam khat le gam khat hong kido ding uh hi.
11. Mun tuamtuam ah zin nakpi-in liing dinga, kialpi le pul hong tung ding hi. Van panin a kihtak-huai nate le lim lianpite hong kilang ding hi.
12. “Ahi zongin hihte khempeuh a pian ma-in, keima min hangin amaute in hong manin hong bawlsia ding uh a, kikhopna inn sung le thong sungah hong khum ding uh hi. Kumpite le mangpite’ mai-ah hong paipih ding uh hi.
13. Hih bangin note in amaute’ tungah teci na panna ding uh hun hoih na ngah ding uh hi.
14. Tua ahih manin note in, ‘Bang ka ci dawnkik ding hiam?’ ci-in na lunghimawh kholh lohna dingun, na lungsim uh khentatsa-in om un.

Hi in Topa’ Lungdamna Laisiangtho ahi hi.