Missionary Sisters of Mary Help of Christian (MSMHC) Kum (83) Cinna Pawi (Oct, 2025)
Christiante’ honghuh Tonu’ kipawlna Pasiannasem Nungak Siangthote ii Kipawlna phutzawh Kum (83) cin na Pawi pen 2025 October kha in mun tuam tuam ah ki bawl hi.
Tua pawi te ah amau kipawlna ii tangthu leh khantohzia, leitungbup ah a Pasian’ nasepnate uh etkikna leh ciaptehna te pen a nuai a bangin ki mu thei hi.
Hih MSMHC Sister te’ ii kipawlna pen 1942 Kum October Kha (24) Ni in Salesian Siadaw khat ahi Most Rev. Stephen Ferrando SDB, D.D. in India gam Nisuahna saklam panin hong phuhkhiat hi a, tu in Leitungbup aom Gam tuamtuam ah kizel in om hi.
Tu hun in Leitungbup a om gam tuamtuam leh Minam tuamtuam te lak pan minam (75) te sung pan Sister suakin tu-in Sister vekpi gawm (1500) kiim bang phata hi. Amaute’ ii Pasian nasepna a tangzai semsem nangin thu ngetsak ciat ni.
Hih MSMHC Sister te in India, Italy, Swaziland, Lesotho, Johannesburg, South Sudan, Mozambique, Ethiopia, USA gamhuam Hawaiian Islands, Sir Lanka, Myanmar, Papua New Guinea (PNG) Philippine, Solomon Islands leh Germany cih gamte ah nasem uh hi.
Tu laitak in amaute in Sister Sang Community (206) nei-in tua Sister Sang te pen gam tuam tuam Diocese/ Siampilian uksung Mun (61) ah om in amaute in tua mun te pan Pasian na sepna nei uh hi.
Hih MSMHC Sisterte’ ii a naseppi’ pen in Pasianthutangkohna, Pilsin sakna, Cidamna ding le Mipi khantoh nading sepna cihte ahi uh hi.
A beisa 2024 kum sungin Amau ii Pasian’ nasepnate hong picing in hong tangzai semsem a Sister (44) in Khantawn kiciamna (Final Vow) leh Sister (66) te in a khatveina kiciamnate hong neithei uh hi. Tua sungah ei Kalay Diocese sung pan Sister (5) zong kihel thei ahih manin ih lungdam hi.
Tukum (2025) sungin zong Pasian nasem thak hong kibehlap a, Sister (22) te in Khantawn kiciamna le Sister (62) te in a khatveina kiciamnate hong bawlzo leuleu uh hi. Tua sungah zong ei Kalay Diocese pan Sister thak (1) kihel beh leuleu ahih manin ih angtang mahmah hi.
Tulaitak in MSMHC Sister asin/akah laitak mimal a nuai abang in kimu thei hi.
Postulants (A lutcil teng) – mi 71
Novices (Kum 1 na) – mi 64
Novices (Kum 2 na) – mi 65
cih bangin Sangnaupang nei uh hi.
Hih MSMHC sangah Nungak Siangtho a suak nuam ih om leh Kalay myo Maryland leh Tedim myo Leitawhtan Nungak Siangtho sang te ah ki dawp thei ahih manin lungdam huai mahmah hi.
