PASIAN KIANGAH GEN DING AA KILAWM KAMMAL TE

Christian khat hihna tawh Pasian kiangah a tawmpen kammal (5) peuhmah nisim gen ding kilawm hi. Nikhat sung koici bang lungsim tawh pankhia cih pen thupi mahmah ahih manin hi kammal (5) te in Nikhat sung lungsim dai takin kipat zawh nading hong panpih zo ding hi.
“Topa aw, hih nithak nong piakna hangin ka lungdam hi.”
Na nikhat hunpen zingsang tungpan nuntakna dingin thupha thak hong piakna hangin Topa tungah lungdamna lungsim tawh kipat ding ahi hi.
“Hih ni pen TOPA’ bawlsa ni hi a, eite lungdamin kipak ni.” (Late 118: 24)

“Topa nangma ngeina bangin na nasempa/nu lam hong lakin.”
Pasian ii akicing gelnate um in na Nikhat kalsuanna lam hong lak, hong makaih nading in Pasian kiangah gen in.
“Na hihna khempeuh ah amah phawk in; tua hi leh na nuntakna lampi hong tangsak ding hi.” (Pau 3: 6)

“Tuni ka tuak ding haksatnate ka paltan zawh nading tha hong guanin.”
Bang bang gentheih haksatna himahtaleh na paltan zawh nading in Pasian kiangah thuakzawhna tha gen in.
“Thahatna hong pia Christu nei ka hih manin na khempeuh ah thuakzawhna ka nei hi.” (Phil 4: 13)

“Topa aw, ka lungtang sungah na kilemna le na nopna hong omsak ta in.”
Nikhat sung tawntung, Pasian ii kilemna le nopna te na lungtang sungah akidim nadingin gen in.
“Topa Pasian in amah na upna uh hangin lungdamna le nopna thupha note hong pia ta hen.” (Rome 15: 13)

“Topa aw, kei na hong it bangin ka kinaipih mite ka it zawh nadingin hong huhin.”
Nikhat sung nasep nabawlnate khempeuh ah Pasian itna ki langhin a kiteh thei lo itna lungtang na neih zawh nadingin thupha ngenin.
“Keimah in note Thupiak thak khat kong piakin ah: Note khat le khat na ki-it un.” (Jn 13: 34)