NU PAWLPI CI A SAPNA

Banghangin Catholic thuzuite in Pawlpi pen “Nu” Pawlpi ci-in sam uh ahi hiam?

Suakkhiatsakna

Pawlpi in Tuisawpna Sacramentu tawh thuzui Christian te hong suak/piangsak hi. Nu khatin a tano pen leitungah hong piangkhiatsak mah bangin Pawlpi in zong thu um mite Pasian’ innkuan sungah hong sam hi.

Tuisawpna Sacramentu ih san khit ciangin Pasian’ tanu/tapa te ih suak mah bangin Topa Jesu ii pumpi ahi, Pawlpi ah thuzui mite ih suak hi.

Hong khansuahna

Pawlpi in thu um tanu/tapa te pen Siangtho Pumpi, Mawhsutna Sacramentu le adang Sacramentu te tawh Kha an hong vakin Kha tha hong guan hi. Upna a khangtoh nadingin hong panpih hi.

Nu khatin a tano, a suakkhia/apiangsak ziau hiloin pantahin, lamlakin makaihin cingin kem hi.

Thu hilhna

Pawlpi in thu um tanu/tapa te pen thu hilhin itna tawh puahpha hi. Pawlpi ii hong hilh thu te in thumanna, siangthona le hotkhiatna ah hong tonpihin lam hong lak hi.

“Nu” kicingtaak khat bangin Pawlpi in hong khanglo sak zelin, tha hong pia zel in thu um tanu/tapa te adingin ahoih pen bek mah lamen hi.

Thu ngetsakna

Pawlpi in thu um tanu/tapa te adingin thu ngetsak hi. Missa biakpiakna te ah Pasian kiang hong thumsak hi.

A picing Nu khatin ama tanu/tapa te khempeuh adingin thu angetsakna pen cikmahhunin khawl ngeilo hi.

Ap na

Topa Jesu mahmah in Pawlpi pen “Nu” in ama nungzuite kiangah na ap hi. Tua ahih manin Catholic thuzuite in Pawlpi pen kipawlna khat bangin ciamteh lo-in anungta innkuan in mu uh hi.

“Nu Pawlpi” cih ciangin nuntakna hong pia, thuman thutak hong hilh, mawhmaisakna hong pia, vantung lampi ah hong sam, hong tonpih Pawlpi cihna hi.