Homily by Rev. Fr. John Aye Kyaw on the Fifth Sunday of Ordinary at St. Mary’s Cathedral Kalay Diocese (8.2.2026)

Tuni Rev. Fr. John Aye Kyaw in “Note in leitung ci leh khuavak na hi uh hi (Mt 5:13-16) bulphuhin “thu gen siamna hang tawh RCM Pawlpi sung a ki lut ding hi leh Khamtunggam ah RC omlo ding hi. Kasane aa kasi a dawn te in tawntung nuntakna ngah ding hi ci-in Topa Jesu in hong gen hi. Topa Jesu ii Silesa a hi Siangtho Pumpi ih san theih na dingin Piantit Topa te in Missa Biakpiakna a na bawlden manun Zogam ah Pasian thuzui RCM a ki suak ahi hi” ci-in gen hi.

Tua ban ah “Piantit Topa te thugen siam kua mah omlo hi. A hi zongin Missa Biakpiakna uh tawh leitung ci leh khua vak na suak uh a hih manun tua Piantit Topa te a mu mite in Pasian thu um in a nuntak pih thei a hi uh hi” ci-in ama muhna hong hawmsawn hi.

A tawpna ah Topa Jesu in a pumpi a hi Siangtho Pumpi balnen in eite a hong piak mah bangin eite in zong ih sumleh paai te, ih pilna ih siamna te mite aa dingin zang khia le hang leitung ci leh khuavak te ih suak ding hi ci-in hilhcian na nei hi.

Rev. Fr. JohnbAye Kyaw pen Siampite kum cin Pasian thu lungngaihna a makaih dingin Mandalay pan a hong pai ahi hi.

Tuni Missa Biakpiakna sungah Siampi (7) leh thuzuite tul kim kihel thei uh hi.

Rev. Fr. John Aye Kyaw aa ding thu ngetsak ciat ni.