Misiangtho Mary Faustina Kowalska(October – 5)
Helena cih misiangtho min nei, Mary Kowalska in Glogowiec aom, Poland minam innkuan sungpan 1905 kumin suak hi. Innteeng nasep sem dingin kum (16) aphak ciangin a inn pan paikhia hi. Kum (20) aphak ciangin “Our Lady of Mercy” cih nungak siangtho sangah lut in nungak siangtho suak hi. Tua lai ah Mary Faustina cih min zang hi.
Aniam pen nasep ahi inn sung nasep te semin tua sangah kum (13) sung ki piakhia hi. Tua bangin inn nasep te nisim asep hun sungin ama ii lungsim sungah koici bangin om ding cih kua mahin phawk kha lo hi. Ahi zongin amah in Pasian tawh kinai semsemna, Pasian tawh kizopna te nei den hi. Amah in kha lam nuntakna pen pumpi tawh kisai nuntakna bangin siang takin mu hi.
“Ih ngahsa thuphate, pulakkhiatna te, alamdang tak a lungnopna te, letsong van te in a kicing Kha nuntakna ah hong tun zo lo hi. Ahi zongin Pasian tawh kizopna, kinaina bek in a kicing Kha nuntakna hong pia zo hi” ci-in ama ii diary sungah gelh hi.
Ama ii Kha thu sungah nuntakna ii phattuamna hangin ama Pasian nasepna ah hehpihna thu thupi sakin hilh zo hi. Mary Faustina in ama kum (33) aphak khit, 1938 kum, October (5) ni-in TB natna tawh si hi.
Misiangtho Mary Faustina aw…Ko te adingin thu hong ngetsak tan.
