Misiangtho Theresa of Avila Pawini.(October – 15)

Avila khua pan Misiangtho Theresa in, Carmelite Nungak Siangtho sang a phuan nu hi a, 1515 kumin, Spain gam, Avila khua-ah suak hi. Amah in a neu tung akipan anuntakna Pasian kiang piakkhiat ding a lunggulh mahmah leh misiangtho te’ tangthu sim ding a uuk mahmah khat ahi hi. Kum (12) aphak hunin anu in sihsan a, Theresa in Tonu Maria lim maiah pai-in “tu pan kipan ka nu hong hi-in” ci-in kap kawmin Tonu kiangah ngen hi.
Kum (20) a phak ciangin Avila khua aom Carmelite nungak siangtho sangah lut a, ahi zongin nungak siangtho te nuntakzia, omzia te amuh ciangin lamdang sa mahmah hi. Bang hang hiam cih leh amau te in suakta takin leengla do uh a, thunget hun leh Pasian thu lungngaih hun cih te awlmawh lo uh hi. Nungak siangtho tampi te in thalawpna nei lo-in a ut bang tek in om uh hi.
Ahi zongin Theresa in ama kipiak khiatna sungah lawptak leh kiptak in om in kalsuan zo hi. Pawlpi ulian te’ khamna kikawmkal ah 1561 kumin, Theresa in Avila khua-ah Discalced Carmelite congregation phuan a, a khauh mahmah thukhun leh gamdaihna te nasiatak zui-in om uh hi. Amaute in zawngkhalna leh kideekna te lahna in shoe khedap tangin (sandal) khau khih khedap te bek bulh uh hi. Kum (6) asawt khit ciangin St. John of the Cross tawh kipawl in Discalced Carmelites congregation puahpha uh a, ngaihsut siamna in akipuah thak kik nungak siangtho te adingin neihloh aphamawh thu hi ci-in ciamteh uh hi.
Theresa in lai tampi gelh a, a laigelh te in Pasian a it mahmah na kilangsak hi. Amah in “lunghihmawhna, launa nei kei-in, bang mah kihta kei-in, na khempeuh a hun a tun ciangin a mangthang ding hi lel hi. Pasian bek kikhel ngei lo hi, thuakzawhna in na khempeuh a zosak hi. Pasian a om nak leh na khempeuh kicing khin zo hi,” ci hi. Ama kiangah Topa Jesu leh misiangtho te kilang zel hi. Theresa Avila in kum (67) aphak hun, 1528 kumin si a, Pawlpi mipil in kiciamteh hi.
Misiangtho Theresa Avila aw…Ko te adingin thu hong ngetsak tan.