
Misiangtho Cecilia Pawini.(November – 22)
La siamte ahuh Misiangtho Cecilia in kumzalom 3 hunin Rome, Italy ah suak hi. Khantawn pasal neilo dingin khentat in a kiciam himahtale a nulepa te thu amanna in Valerian a kici tangval khat tawh teeng hi. Mopawi bawl hunsung mahin Cecilia in alungsim sungah Pasian phatna la sa in om hi.
A khan sunguh ah atawlngak uh ciangin, Cecilia in a lawmpa Velerian tawh thukimna khat bawl uh hi. Cecilia in ama pumpi, Pasian tungah a ap khitna thu gen in Valerian lungsim ki khel sak aa, nupa bangin omkhop loh ding thukim uh hi. A lawmpa zong thu-um thuzui mi khat hong suakin a nih-un nupa bangin omkhawm lo-in Pasian’ thu bek tawh nungta uh hi.
Valerian in tuisawpna asan khit ciangin mangmuhna khat ngah hi. Tua amang muhna ah Vantungmi khatin Cecilia gei ah dingin Lingpaak tawh akibawl paakkual khat, Cecilia ii lutungah khuksak hi.
Cecilia in Valerian ii naupa Tiburtius zong kikhel sak zo hi. AD192 kum, Commodus in Pawlpi abawlsiat ciangin Valerian leh Tiburtius te unau kimanin Pagua Triopius a cihna mun ah paipihin that uh hi. Amaute nih a kithat zawh a sawt lo-in Cecilia zong kiman a, Thukhenmang khat ahi, Prefect Almachius mai-ah ama upna kiciam sak uh hi. Tua khit ciangin angawng pan thum vei satin sidektakin koih uh a, Cecilia in ni thum sung athuak khit ciangin si hi.
Cecilia asih ciangin aluang pen St. Callistus hanah vui uh a, hun khat ciangin Trastevere a om, St. Cecilia biakinn ah tuah kik uh hi. 1599 kum ciangin Cecilia ii luanghawm kisia lo-in a ihmu bangin a om ki mu hi. Misiangtho Cecilia pen lasiamte a cing a kem Misiangtho in kiciamteh hi.
Misiangtho Cecilia aw…Ko te adingin thu hong ngetsak tan.



