John 2:13-22

13. Jew mite’ Pascha* pawi hun hong tung dekta ahih manin, Jerusalem khuapi ah Jesu a paito hi.
14. Biakinnpi sungah bawngte, tuute, vakhute a zuak mite le sum khekte a tu a muh ciangin;
15. a satna ding khau tep bawl a, tuate khempeuh, tuu le bawngte biakna innpi sung pan hawlkhia a, sum khekte’ sumte buakkhiatsakin amaute’ sabuaite a lumletsak hi.
16. Amah in vakhu zuakte’ kiangah, “Hihte hih mun panin lakhia un. Ka Pa’ inn van zuakna mun na suaksak kei un,” a ci hi.
17. Tua ciangin a nungzuipite in, “Nangma inn ka deih luatna in kei hong netum ding hi,” ci-a kigelh Lai Siangtho kammalte a phawk uh hi.
18. Tua ciangin Jew mite in ama kiangah, “Hih banga na hih theihna dingin kote bang lim hong lak thei ding na hi hiam?” a ci uh hi.
19. Jesu in amaute’ kiangah, “Hih biakinnpi susia un, nithum sungin ka lamkik ding hi,” ci-in a dawng hi.
20. Tua ciangin Jew mite in, “Hih biakinnpi kum sawmli le kum guk sung tawntung a kilam ahi hi. Nangmah in ni thum sungin lamkik zo ding na hi hiam?” a ci uh hi.
21. Ahi zongin Jesu in ama pumpi ahi biakinnpi a genna ahi hi.
22. Tua ahih manin, amah a kithawh sak ciangin a nungzuipite in hih a gensa thute phawk kik uh a, Lai Siangtho le Jesu’ thu a um uh hi.

Hi in Topa’ Lungdamna Laisiangtho ahi hi.