KITEENNA LEH PAWLPI (Mission) NASEPNA
Kiteenna cihpen Pasal(Mopa) leh Numei(Monu) te kithukimna tawh khat le khat nuntaakna kipumpiak tuakna hi a, atulngeilo amang ngeilo mong neilo itna Seal kipiakna tawh Nupa suahna ahihi. CCC 1627-1628, 2349.
Kiteenna Sacramentu asaang Nupa te pen khat le khat anuntaakna uh akipumpiak tuakna tawh Pasian’ geelsa ngiimna ataangtungsak ding, Pasian’ geelsa nasep asem khiadingin asiangtho saptuamna angah Nupa te ahihi. CCC 1535.
Vantunggam aadingin gehbang suahna Mt 19:12 leh Nupa suahna in kikhentuam theilo bek thamlo in akizaakimh tuak ahihi. CCC 1620;cf Mt 19:3-12. Kiteenna (Nupa suahna) thusimlo asusia (Kikhenna apiangsak) mi in nuntaak siangtho na alangpang, asusia ahihi. Cf Mt 19:6 Banghanghiam cih leh Pasian pen Kiteenna (Nupa suahna) aphuankhiapa ahihmanin Nupa kikhenna, ki khensakna in Pasian langpanna hipah hi. Kiteenna pen Pasal le Numei Nupa suahna Innkuan suahna ah asiangtho Pasian’ saptuamna (Vocation) mah ahihi. GS 48/1
NUPA SUAHNA AH PASIAN’ NGIIMNA
Kiteenna Nupa suahna ah Pasian’ ngiimna in ciipha in leitung adimding leh Pawlpi(Mission) nasem ding ahihi. Ciipha in leitung dimdiing; Christian Nu le Pa te pen ki-itna taktawh khat le khat ki cihtak ding leh Tapa tanu suan le paak tawiding vaipuak thupi nam 2 aneite ahihi. Banghanghiam cih leh Pasian in ciipha in leitung adimding leh apiansaksa nate a uk akem dingin Pasal leh Numei nabawl hi, Gen 2:18,28. Tuhun ciangin zatui zahaa tuamtuam zangh in nauhal, naukhaak cih bek hilo sunga paiilai nau lakhia atuamtuam hongpiang hi. Tapa tanu suan le paak cih pen deih man a neih hilo Thupha ahihi. CCC 2378; Ps 127:3. Tanu Tapa suan le paak cih pen Nupa ki-itna ii agah (Ahihkeileh) vangliatna Lukhu ahihi. GS 48/2. Tanu Tapa suan le paak cih pen kiteenna Nupa suahna hanga mankiseh zolo amanpha pen Pasian’ hongpiak Thupha (ahihkeileh) Letsong CCC 1652; GS 48/1,50 hi a, Nu in apaii mapekin Pasian in thei in asuahma in siangthosak khin hi. CCC 2270; Jer 1:5; cf Job 10:8-12; Ps 22:10-11.
Sunga paiilai nau lakkhiatna in mithahna lian mahmah hi a, mihing’ vangneihna zaa leh Vanglian Pasian naakpitak a, langpanna suksiatna ahihi. CCC 2320. Mawhna lian ahihman in Pawlpi tawh kizopna neithei nawnlo hi. Pawlpi pan amah leh amah (Auto) in akihemkhia ahihi. CIC 1398, 1314, cf 1323-1324; CCC 2270-2275, 2322.
Zatui zahaa tuamtuam zangh a nauhalna, khaakna te zongh Pasian langpanna ahihi. cf CCC 2270-2275.
Mihing ahih nakleh anungta ding CCC 2322 ahih mah bangin Tanu Tapa suan le paak tawi a, limtak phatak kep le khoina in Pasian’ hongpiak vaipuak nasep sepkhiatna hi a athupi mahmah Pasian’ nasepna(Mission) ahihi. Pawlpi(Mission) nasepna Innkuan khat-Pawlpi khat; Pawlpi khat-Innkuan khat CCC 1651-1657, 1666, 22212231, 2249, 2251-2253 ahihmah bangin Christian Innkuan sungpen Upna khaicii akivawh masak penna mun Lolai ahihi. Christian Innkuan sung pen Thupha leh kipawlkhop, thunget khop masakpen namun ahihi. Christian Innkuan sungpen Pilna ciimna leh thuhoih thupha akihilh masakpen na saanginn ahihi. Christian innkuan sung pen Christian nuntaakna leh khantohna tuamtuam akipat masak pen na saanginn ahihi. Christian nuntaak khuasak zia khempeuh a phulkhiatna mun ahihi. Innkuan sungpen asia apha akipat masak na mun ahihi. CCC 1615, 1617; GS 52/1; CCC 1666
Kiteenna Sacramentu asang Christian Nupa cihpen suan le paak nei-in tawi miaimuai dingbek hilo in tate adingin leitungthu khaa thu ah lamhoih lampha a lak Makai masa Sia masa ahi hi. CCC 2221, 2223, 2225. Thukhualna, lungduaina, mi thupibawlna, cihtakna, Angsung khuallohna akipan ahoih apha kipattah nading amunhoih pen in Inn ahihi. CCC 2223, Christian Nu le pa te in Naupangte pen Upna thu genpih, thungetzia te hilhbek hilo thu ngetpih, Kikhoppih dending leh Sacramentu te asantheih nading makaih in Pawlpi sungah Upna zungthuuk akhaktheih nadingin aneu a kipan lamhilh in makaih dinghi. CCC 2226.
Tate’ mailam nuntaak khuasakzia ding ngaihsutsak dinghi. Adiakdiakin sangkahsak dinghi. Mipi cingkhat hongsuah kuan ciangin amau’ lunggulh sang kahsak dinghi. Nasep silbawl sumzon paiizon nate ah amau’ nasep suaktatakin semsak dinghi. Zineih Pasal neihhun ciangin amau’ ngaih pa amau’ ngaihnu tawh awipah lel dinghi.
Hibangin tate mailam ading aneu aa kipan lunghianglo itsitlo takin pantah in makaihna in Christian Nu le Pa adingin athupipen amanphapen Pawlpi(Mission) nasepna ahihi. Pawlpi hita leh kipawlna khatpeuh hitaleh mikhempeuh’ hoihna ding phat nadingpen Nupa kaal, Innkuannuam sungpan hongkizom hi.
‘Christian Innkuan’ cih Laisiangtho thak sungah kiteltakin ihmuh mah bangin Pawlpi sungah Innkuan thupi mahmah hi. CCC 2204; Eph 5:21-6:4; Col 3:18-21; IPet 3:1-7.
¹
From; Sia William DSPiang. St. Jude’s Church, Laaitui.
